ఐకాన్ స్టార్ అల్లు అర్జున్, స్టార్ డైరెక్టర్ అట్లీ కాంబినేషన్లో తెరకెక్కుతున్న భారీ చిత్రం ‘రాకా’పై రోజురోజుకూ అంచనాలు పెరుగుతున్నాయి. ఈ సినిమాలో తాజాగా తెలుగు నటి సిరి హనుమంతుకు కీలక పాత్ర దక్కినట్లు సమాచారం.
గతంలో ‘సీతా పయనం’లో నటించిన సిరి హనుమంతు, ప్రస్తుతం ‘చెన్నై లవ్ స్టోరీ’లోనూ కనిపించనున్నారు. అయితే అల్లు అర్జున్ ‘రాకా’లో ఆమె భాగం కానున్న విషయాన్ని నిర్మాత ఎస్.కె.ఎన్ ఓ కార్యక్రమంలో వెల్లడించారు. ఆమె పాత్రకు సంబంధించిన పూర్తి వివరాలు మాత్రం ఇంకా బయటకు రాలేదు.
ప్రస్తుతం ఈ సినిమా షూటింగ్ ముంబైలో శరవేగంగా జరుగుతోంది. భారీ యాక్షన్ ఎపిసోడ్స్తో తెరకెక్కుతున్న ఈ చిత్రంలో అట్లీ తన మార్క్ స్టైల్లో విజువల్ ట్రీట్ ఇవ్వనున్నట్లు తెలుస్తోంది.
ఈ సినిమాలో దీపికా పడుకోణె, మృణాల్ ఠాకూర్, జాన్వీ కపూర్ వంటి ప్రముఖ హీరోయిన్లు నటిస్తున్న విషయం తెలిసిందే. మాఫియా బ్యాక్డ్రాప్లో ఓ డాన్ చుట్టూ తిరిగే కథగా ఈ చిత్రం రూపొందుతోందని సమాచారం.
సన్ పిక్చర్స్ బ్యానర్పై తెరకెక్కుతున్న ఈ ప్రాజెక్ట్ కోసం అంతర్జాతీయ స్థాయి టెక్నీషియన్లు పనిచేస్తున్నారు. భారీ బడ్జెట్తో రూపొందుతున్న ‘రాకా’ అల్లు అర్జున్ కెరీర్లో మరో ప్రత్యేకమైన చిత్రంగా నిలుస్తుందని అభిమానులు భావిస్తున్నారు.
