ఆదివారం జరిగింది ఎంగేజ్మెంట్ కాదు.. కాబోయే భార్య కావ్యారెడ్డిని పరిచయం చేసిన బెల్లంకొండ శ్రీనివాస్!

ప్రముఖ నిర్మాత బెల్లంకొండ సురేష్ తనయుడు, యంగ్ హీరో బెల్లంకొండ సాయి శ్రీనివాస్ త్వరలోనే ఒక ఇంటివాడు కాబోతున్నారు. గత కొన్ని రోజులుగా సోషల్ మీడియాలో జరుగుతున్న ప్రచారంపై స్పందిస్తూ, తనకు కాబోయే భార్య కావ్యారెడ్డిని ఆయన అధికారికంగా పరిచయం చేశారు. అయితే ఆదివారం జరిగింది నిశ్చితార్థం (Engagement) కాదని, అది కేవలం కుటుంబ సభ్యుల మధ్య జరిగిన ఒక చిన్న వేడుక మాత్రమేనని ఆయన స్పష్టం చేశారు. సంబరాలు ఇప్పుడే మొదలయ్యాయని, త్వరలోనే పెళ్లి తేదీని వెల్లడిస్తానని శ్రీనివాస్ తెలిపారు.
తన కాబోయే భార్యతో కలిసి దిగిన ఫోటోలను ఇన్‌స్టాగ్రామ్‌లో షేర్ చేస్తూ శ్రీనివాస్ ఒక ఎమోషనల్ నోట్ రాసుకొచ్చారు. "కావ్యమ్మ.. జీవితానికి ఒక అందమైన సమయం ఉంది, అది నిన్ను నా ప్రపంచంలోకి తీసుకొచ్చింది. నా జీవితంలోకి వచ్చినందుకు, నాపై విశ్వాసం ఉంచినందుకు థాంక్స్. నీ ముఖంపై చిరునవ్వు ఎప్పటికీ వాడిపోనీయను. మనం కలిసి జీవించే అద్భుత క్షణాల కోసం ఎదురుచూస్తున్నాను" అంటూ తన ప్రేమను వ్యక్తపరిచారు. ఈ పోస్ట్‌కు అభిమానుల నుంచి పెద్ద ఎత్తున అభినందనలు వెల్లువెత్తుతున్నాయి.
ప్రస్తుతం ఈ ఫోటోలు ఇంటర్నెట్‌లో విపరీతంగా వైరల్ అవుతున్నాయి. అభిమానుల ప్రేమ, సహకారమే తన ప్రపంచమని శ్రీనివాస్ పేర్కొన్నారు. కెరీర్ పరంగా వరుస సినిమాలతో బిజీగా ఉన్న ఈ యంగ్ హీరో, ఇప్పుడు తన వ్యక్తిగత జీవితంలో కొత్త ప్రయాణాన్ని మొదలుపెట్టబోతుండటంతో టాలీవుడ్ వర్గాల్లో సందడి నెలకొంది. త్వరలోనే వీరి వివాహ వేడుకకు సంబంధించిన మరిన్ని వివరాలు వెలువడే అవకాశం ఉంది.