పవర్ స్టార్ పవన్ కళ్యాణ్ అభిమానులు ఎప్పుడెప్పుడా అని ఎదురుచూస్తున్న క్షణం వచ్చేసింది. మాస్ డైరెక్టర్ హరీష్ శంకర్ దర్శకత్వంలో రూపొందుతున్న మోస్ట్ అవైటెడ్ ఫిల్మ్ ‘ఉస్తాద్ భగత్ సింగ్’ విడుదల తేదీ మార్పును చిత్ర నిర్మాతలు అధికారిక ప్రకటన విడుదల చేశారు. ముందుగా ఈ సినిమా మార్చి 26, 2026న విడుదల కావాల్సి ఉండగా.. 2026, మార్చి 19న ఉగాది పండుగ కానుకగా ఈ చిత్రాన్ని ప్రపంచవ్యాప్తంగా భారీ ఎత్తున విడుదల చేయబోతున్నట్లు మైత్రీ మూవీ మేకర్స్ స్పష్టం చేశారు. ఈ ప్రకటనతో టాలీవుడ్ బాక్సాఫీస్ వద్ద రికార్డుల వేట మొదలైందని ట్రేడ్ వర్గాలు విశ్లేషిస్తున్నాయి.
సెలవుల జాతర
కేవలం సినిమాపై ఉన్న అంచనాలే కాదు, ఈ సినిమా విడుదలవుతున్న సమయం కూడా ట్రేడ్ పరంగా అద్భుతమైన అడ్వాంటేజ్ను ఇస్తోంది. మీరు గమనించినట్లుగా, మార్చి 19 నుండి ఏప్రిల్ మొదటి వారం వరకు వరుసగా పండుగలు, సెలవులు ఉండటం ఈ సినిమాకు పెద్ద ప్లస్ పాయింట్.
మార్చి 18: ప్రీమియర్స్ వేయనున్నారు.
మార్చి 19 (గురువారం): ఉగాది పండుగ. తెలుగు రాష్ట్రాల్లో పెద్ద పండుగ కావడంతో తొలిరోజు కలెక్షన్లు ఆల్-టైమ్ రికార్డులను తాకవచ్చు.
మార్చి 20 (శుక్రవారం): రంజాన్ (ఈద్) సెలవు. వరుసగా రెండో రోజు కూడా హౌస్ ఫుల్ బోర్డులు పడటం ఖాయం.
మార్చి 21, 22: ఫస్ట్ వీకెండ్ (శని, ఆదివారాలు). ఫ్యామిలీ ఆడియన్స్ థియేటర్లకు పోటెత్తుతారు.
మార్చి 27 (శుక్రవారం): శ్రీరామనవమి సెలవు. రెండో వారం కూడా స్ట్రాంగ్ ఓపెనింగ్స్ రావడానికి ఇది దోహదపడుతుంది.
ఏప్రిల్ 3 (శుక్రవారం): గుడ్ ఫ్రైడే, ఆపై వచ్చే వీకెండ్.
రికార్డుల వేట మొదలు
గతంలో పవన్ కళ్యాణ్ – హరీష్ శంకర్ కాంబినేషన్లో వచ్చిన ‘గబ్బర్ సింగ్’ ఎలాంటి సంచలనం సృష్టించిందో అందరికీ తెలిసిందే. ఇప్పుడు ‘ఉస్తాద్ భగత్ సింగ్’ విషయంలోనూ అదే మేజిక్ రిపీట్ అవుతుందని మేకర్స్ ధీమాగా ఉన్నారు. సినిమాకు గనుక పాజిటివ్ టాక్ వస్తే, ఈ వరుస సెలవుల పుణ్యమా అని కేవలం రెండు వారాల్లోనే ఈ చిత్రం నాన్-రాజమౌళి రికార్డులను సునాయాసంగా అధిగమించే అవకాశం ఉంది. వేసవి సెలవులు ప్రారంభం కావడానికి ముందే వచ్చే ఈ పండుగ సీజన్, పవర్ స్టార్ మాస్ పవర్ కలిస్తే బాక్సాఫీస్ వద్ద ‘భగత్ సింగ్’ విధ్వంసం ఆపడం ఎవరితరం కాకపోవచ్చు. భారీ అంచనాలతో విడుదల అవుతున్న ఈ సినిమా మరింత ముందుకు రావడంతే ఫ్యాన్స్ సంబరాలు చేసుకుంటున్నారు.
