అడివి శేష్, మృణాల్ ఠాకూర్ జంటగా నటిస్తున్న లవ్ యాక్షన్ డ్రామా ‘డెకాయిట్’ విడుదల తేదీ ఖరారైంది. అన్నపూర్ణ స్టూడియోస్ నిర్మిస్తున్న ఈ చిత్రాన్ని సమ్మర్ కానుకగా ఏప్రిల్ 10న తెలుగు, హిందీ భాషల్లో విడుదల చేయనున్నట్లు మేకర్స్ అధికారికంగా ప్రకటించారు. వాస్తవానికి ఈ సినిమాను మార్చి 19న ఉగాది సందర్భంగా విడుదల చేయాలని భావించినప్పటికీ, తాజా మార్పులతో ఏప్రిల్ నెలకు వాయిదా వేశారు. అదే రోజున నిఖిల్ ‘స్వయంభు’ కూడా వచ్చే అవకాశం ఉండటంతో బాక్సాఫీస్ వద్ద ఆసక్తికర పోటీ నెలకొనేలా ఉంది.
రిలీజ్ డేట్ అనౌన్స్మెంట్తో పాటు చిత్రబృందం ‘రూబరూ’ అనే వీడియో సాంగ్ను విడుదల చేసింది. భీమ్స్ సిసిరీలియో సంగీతం అందించిన ఈ మెలోడీ పాటలో అడివి శేష్, మృణాల్ మధ్య కెమిస్ట్రీ అద్భుతంగా కుదిరింది. చిన్మయి శ్రీపాదతో కలిసి భీమ్స్ స్వయంగా పాడిన ఈ పాటలో హీరో హీరోయిన్ల మధ్య ఉన్న గాఢమైన ప్రేమను, లిప్ లాక్ సీన్లను చూపించారు. ప్రేమలో ఉన్న ఒక యువకుడు తన ప్రియురాలి వల్ల కలిగిన మోసం కారణంగా డెకాయిట్గా ఎందుకు మారాల్సి వచ్చింది అనే ఆసక్తిని ఈ పాట ద్వారా మేకర్స్ రేకెత్తించారు.
షానీల్ డియో దర్శకత్వం వహిస్తున్న ఈ చిత్రంలో బాలీవుడ్ ప్రముఖ దర్శకుడు అనురాగ్ కశ్యప్ కీలక పాత్ర పోషిస్తున్నారు. ప్రకాష్ రాజ్, సునీల్, అతుల్ కులకర్ణి వంటి దిగ్గజ నటులు ఇతర ప్రధాన పాత్రల్లో కనిపిస్తున్నారు. భాస్కర భట్ల రవికుమార్ అందించిన అర్థవంతమైన సాహిత్యం, హై క్వాలిటీ విజువల్స్ ఈ సినిమాపై అంచనాలను పెంచుతున్నాయి. ఒక విభిన్నమైన ప్రేమ కథను యాక్షన్ బ్యాక్డ్రాప్లో అన్నపూర్ణ స్టూడియోస్ భారీ స్థాయిలో నిర్మిస్తోంది.
