2001లో వచ్చిన ‘ఆనందం’ సినిమాతో ఓ వెలుగు వెలిగిన నటి రేఖ వేదవ్యాస్ తాజాగా తన వ్యక్తిగత జీవితంలోని విషాదాన్ని పంచుకున్నారు. కెరీర్ ప్రారంభంలో సినిమాలతో బిజీగా ఉండటం వల్ల వివాహంపై పెద్దగా ఆసక్తి చూపలేదని, కానీ ఇప్పుడు తోడు కావాలని అనిపిస్తోందని ఆమె తెలిపారు. అయితే, గత కొన్నేళ్లుగా తాను ఎదుర్కొంటున్న అనారోగ్య సమస్యల కారణంగా పెళ్లి చేసుకోవడానికి ఎవరూ ముందుకు రావడం లేదని ఆమె కన్నీటి పర్యంతమయ్యారు.
సినిమా రంగుల ప్రపంచంలో పీక్ స్టేజ్లో ఉన్నప్పుడే ఆమెకు ఆరోగ్య సమస్యలు మొదలయ్యాయి. దీనివల్ల శారీరకంగానే కాకుండా మానసికంగా కూడా ఎంతో కుంగిపోయానని రేఖ వివరించారు. ఒకప్పుడు క్యూట్ లుక్స్తో మెరిసిపోయిన ఆమె, అనారోగ్యం కారణంగా బక్కచిక్కిపోవడంతో రీఎంట్రీ ఇవ్వాలన్న ప్రయత్నాలు కూడా ఫలించలేదు. బయటకు సెలబ్రిటీల జీవితాలు అందంగా కనిపించినా, లోపల ఎంతో ఒంటరితనం, బాధ ఉంటాయని ఆమె ఈ సందర్భంగా గుర్తు చేసుకున్నారు.
తొందరపడి తప్పుడు నిర్ణయం తీసుకుని తర్వాత విడాకుల వరకు వెళ్లే కంటే, ఆలస్యమైనా తనను అర్థం చేసుకునే సరైన వ్యక్తి కోసం వేచి చూడటమే మేలని ఆమె అభిప్రాయపడ్డారు. తెలుగులో ‘దొంగోడు’, ‘జానకి వెడ్స్ శ్రీరామ్’ వంటి చిత్రాలతో అలరించిన ఆమె, త్వరలోనే పూర్తి ఆరోగ్యంతో మళ్లీ ప్రేక్షకుల ముందుకు రావాలని అభిమానులు కోరుకుంటున్నారు. ప్రస్తుతం ఈమెకు సంబంధించిన వార్తలు సోషల్ మీడియాలో వైరల్గా మారాయి.
