‘మసూద’, ‘బలగం’ వంటి వరుస విజయాలతో టాలీవుడ్లో తనకంటూ ఒక ప్రత్యేక గుర్తింపు తెచ్చుకున్న తెలుగు అమ్మాయి కావ్య కళ్యాణ్ రామ్. బాలనటిగా ఎందరో స్టార్ హీరోల సినిమాల్లో నటించిన ఆమె, కథానాయికగా మారిన తర్వాత వైవిధ్యమైన కథలను ఎంచుకుంటూ దూసుకుపోతున్నారు. తాజాగా ఆమె నటిస్తున్న కొత్త చిత్రం ‘వాట్స్ అప్ నరేష్’ గ్లింప్స్ను చిత్ర యూనిట్ విడుదల చేసింది. ‘కొత్త పోరడు’ ఫేమ్ అన్వేష్ మైఖేల్ హీరోగా నటిస్తున్న ఈ సినిమా, యూత్ ఫుల్ రొమాంటిక్ కామెడీ ఎంటర్టైనర్గా తెరకెక్కుతోంది.
ఈ గ్లింప్స్లో హీరో అన్వేష్ మైఖేల్ పాత్ర హైలైట్గా నిలిచింది. 80 లక్షల కట్నం ఇచ్చే అమ్మాయిని పెళ్లి చేసుకోమని తల్లిదండ్రులు చెబితే.. “ఎనిమిది కోట్లు కట్నం ఇస్తే ఎన్ని కాలాలైనా వెయిట్ చేస్తా” అంటూ ఆయన చెప్పే డైలాగ్ నవ్వులు పూయిస్తోంది. ఇందులో హీరో సాఫ్ట్వేర్ ఉద్యోగిగా కనిపిస్తుండగా, గ్లింప్స్ చివర్లో కావ్య కళ్యాణ్ రామ్ కేవలం ‘హాయ్’ అంటూ పలకరించి ఆసక్తిని పెంచారు. బ్యాక్ గ్రౌండ్లో వచ్చే “లోకం తీరింతే… నువ్వే మారాలంతే” అనే సాంగ్ యువతను ఆకట్టుకునేలా ఉంది.
సివివి సినిమా పతాకంపై భాగ్యలక్ష్మి చింత నిర్మిస్తున్న ఈ చిత్రానికి సివి విశాల్ దర్శకత్వం వహిస్తున్నారు. ఈ సినిమాలో సాయి సంతోష్, ఉషశ్రీ మురళి తదితరులు కీలక పాత్రల్లో నటిస్తున్నారు. ప్రేమికుల రోజు (ఫిబ్రవరి 14) సందర్భంగా ఈ సినిమాకు సంబంధించిన రెండో గ్లింప్స్ను విడుదల చేయనున్నట్లు మేకర్స్ ప్రకటించారు. వైవిధ్యమైన కాన్సెప్ట్తో వస్తున్న ఈ సినిమా కావ్య కళ్యాణ్ రామ్ కెరీర్లో మరో హిట్ అవుతుందో లేదో చూడాలి.
