జాతీయ అవార్డు గ్రహీత, ప్రముఖ నటి కీర్తి సురేశ్ తన డెడికేషన్తో మరోసారి అందరినీ ఆశ్చర్యపరిచింది. తన తాజా ప్రాజెక్ట్ కోసం ఆమె ఏకధాటిగా 9 గంటల పాటు డబ్బింగ్ చెప్పినట్లు సోషల్ మీడియా ద్వారా వెల్లడించింది. డబ్బింగ్ స్టూడియోలో కాస్త అలసిపోయినట్లుగా ఉన్న ఫోటోను తన ఇన్స్టాగ్రామ్ స్టోరీలో పంచుకుంటూ.. “9 గంటల లాంగ్ డబ్బింగ్ సెషన్ తర్వాత నా పరిస్థితి ఇది” అని చమత్కరించింది. సాధారణంగా తన పాత్రలకు తానే డబ్బింగ్ చెప్పుకునే కీర్తి, పాత్రలో పరిపూర్ణత కోసం ఎంతగా శ్రమిస్తుందో ఈ పోస్ట్ ద్వారా మరోసారి నిరూపితమైంది.
కీర్తి సురేశ్కు డబ్బింగ్తో ఒక ప్రత్యేక అనుబంధం ఉంది. ‘మహానటి’ చిత్రంలో సావిత్రి గారి పాత్రకు ఆమె తెలుగు, తమిళ భాషల్లో స్వయంగా డబ్బింగ్ చెప్పి ఆ పాత్రకు ప్రాణం పోసింది, ఇది ఆమెకు నేషనల్ అవార్డును కూడా తెచ్చిపెట్టింది. ఇటీవల విడుదలైన ‘కల్కి 2898 ఏడీ’ చిత్రంలో ‘బుజ్జి’ అనే ఏఐ క్యారెక్టర్కు ఏకంగా ఐదు భాషల్లో (తెలుగు, తమిళం, హిందీ, మలయాళం, ఇంగ్లీష్) వాయిస్ అందించి తన బహుముఖ ప్రజ్ఞను చాటుకుంది. తన గొంతులోని వైవిధ్యాన్ని ప్రదర్శిస్తూ విభిన్న మాడ్యులేషన్లతో ప్రేక్షకులను అలరించడం ఆమె ప్రత్యేకత.
ప్రస్తుతం కీర్తి సురేశ్ వరుస ప్రాజెక్టులతో బిజీగా ఉంది. తెలుగులో విజయ్ దేవరకొండ సరసన రవికిరణ్ కోల దర్శకత్వంలో ‘రౌడీ జనార్ధన’ అనే భారీ యాక్షన్ డ్రామాలో నటిస్తోంది. అలాగే మలయాళంలో ఆంటోనీ వర్గీస్ (పేపే) తో కలిసి ‘తొట్టం’ అనే ప్యాన్-ఇండియా చిత్రంలో మునుపెన్నడూ చూడని యాక్షన్ అవతార్లో కనిపించనుంది. వీటితో పాటు తమిళంలో ‘రివాల్వర్ రీటా’, హిందీలో ‘అక్కా’ అనే రివెంజ్ థ్రిల్లర్ సిరీస్లో కూడా నటిస్తూ దేశవ్యాప్తంగా తన ముద్ర వేస్తోంది.
