వెంకటేష్ హీరోగా త్రివిక్రమ్ తెరకెక్కిస్తున్న ‘ఆదర్శ కుటుంబం’ సినిమా అనౌన్స్మెంట్ నుండే భారీ అంచనాలను మూటగట్టుకుంది. ఈ క్రమంలో ఈ చిత్రంలో ఒక కీలక పాత్ర కోసం నారా రోహిత్ను ఎంపిక చేసినట్లు సమాచారం. అందుతున్న సమాచారం ప్రకారం, నారా రోహిత్ ఇందులో ఒక ‘యాంటీ కాప్’ (నెగటివ్ షేడ్స్ ఉన్న పోలీస్) పాత్రలో కనిపించనున్నారట. ఇప్పటికే ఆయన షూటింగ్లో కూడా జాయిన్ అయ్యారని, ఆయనకు సంబంధించిన కొన్ని కీలక సన్నివేశాల చిత్రీకరణ కూడా పూర్తయిందని ఇన్సైడ్ టాక్.
ఈ సినిమాలో వెంకటేష్ సరసన ‘కె.జి.ఎఫ్’ ఫేమ్ శ్రీనిధి శెట్టి కథానాయికగా నటిస్తోంది. ‘యానిమల్’ ఫేమ్ హర్షవర్ధన్ రామేశ్వర్ ఈ చిత్రానికి సంగీతాన్ని అందిస్తున్నారు. త్రివిక్రమ్ మార్క్ ఫ్యామిలీ ఎమోషన్స్తో పాటు, నారా రోహిత్ పాత్ర సినిమాకు కొత్త డైమెన్షన్ ఇస్తుందని సినీ వర్గాలు భావిస్తున్నాయి. వైవిధ్యమైన పాత్రలకు కేరాఫ్ అడ్రస్గా నిలిచే నారా రోహిత్, త్రివిక్రమ్ డైరెక్షన్లో వెంకీతో స్క్రీన్ షేర్ చేసుకోవడం మెగా-నందమూరి అభిమానులతో పాటు సామాన్య ప్రేక్షకుల్లోనూ ఆసక్తిని పెంచుతోంది.
ప్రస్తుతం ఈ సినిమా షూటింగ్ అత్యంత వేగంగా జరుగుతోంది. నిజానికి ఈ చిత్రాన్ని సమ్మర్ కానుకగా విడుదల చేయాలని భావించినప్పటికీ, కొన్ని సాంకేతిక కారణాల వల్ల విడుదల తేదీ వాయిదా పడింది. త్వరలోనే మేకర్స్ కొత్త రిలీజ్ డేట్ను అధికారికంగా ప్రకటించనున్నారు. ఈ సినిమా పూర్తి కాగానే వెంకటేష్ తన తదుపరి చిత్రం ‘దృశ్యం 3’ పై దృష్టి పెట్టనున్నారు.
