మెగాస్టార్ చిరంజీవి నటించిన ‘మన శంకర వరప్రసాద్ గారు’ చిత్రం బాక్సాఫీస్ వద్ద ఆల్ టైమ్ ఇండస్ట్రీ రికార్డులను తిరగరాస్తోంది. సంక్రాంతి కానుకగా విడుదలైన ఈ సినిమా, కేవలం వారం రోజుల్లోనే ప్రపంచవ్యాప్తంగా రూ. 292 కోట్ల గ్రాస్ వసూలు చేసి సంచలనం సృష్టించింది. సోమవారం నాటి వసూళ్లతో కలిపి ఈ చిత్రం రూ. 300 కోట్ల క్లబ్లో చేరిపోయింది. దీనితో గతంలో ఉన్న ‘సంక్రాంతికి వస్తున్నాం’ (రూ. 303 కోట్లు) రికార్డును అధిగమించి, అత్యధిక వసూళ్లు రాబట్టిన ప్రాంతీయ చిత్రంగా నిలిచేందుకు సిద్ధమైంది.
తెలుగు రాష్ట్రాల్లోనే కాకుండా ఓవర్సీస్ మార్కెట్లో కూడా ఈ సినిమా ప్రభంజనం సృష్టిస్తోంది. నార్త్ అమెరికాలో ఈ చిత్రం ఇప్పటికే 3 మిలియన్ డాలర్ల వసూళ్లను సాధించింది. చిరంజీవి కెరీర్లో అమెరికా గడ్డపై ఈ మైలురాయిని అందుకున్న మొదటి చిత్రంగా ఇది రికార్డు సృష్టించింది. ఇక ఏడో రోజున ఆంధ్రప్రదేశ్ మరియు తెలంగాణ రాష్ట్రాల్లో అత్యధిక షేర్ వసూలు చేసిన చిత్రంగా ఆల్ టైమ్ ఇండస్ట్రీ రికార్డును మేకర్స్ అధికారికంగా ప్రకటించారు. ఇప్పటికే అన్ని ఏరియాల్లో బ్రేక్ ఈవెన్ పూర్తి చేసుకున్న ఈ చిత్రం రెండో వారంలోనూ అద్భుతమైన ఆక్యుపెన్సీతో దూసుకుపోతోంది.
వరుసగా రెండేళ్లలో రెండు రూ. 300 కోట్ల సినిమాలను అందించిన దర్శకుడిగా అనిల్ రావిపూడి అరుదైన ఘనతను సొంతం చేసుకున్నారు. అనిల్ రావిపూడి మార్క్ కామెడీ మరియు చిరంజీవి మెగా మేనరిజమ్స్ తోడవ్వడంతో ఫ్యామిలీ ఆడియన్స్ థియేటర్లకు బ్రహ్మరథం పడుతున్నారు. ఆరు రోజుల్లోనే లాభాల్లోకి వచ్చిన ఈ సినిమా, రాబోయే రోజుల్లో మరిన్ని రికార్డులను కొల్లగొట్టడం ఖాయమని ట్రేడ్ వర్గాలు విశ్లేషిస్తున్నాయి.
