సూపర్ స్టార్ రజనీకాంత్ (Rajinikanth) 75వ జన్మదినాన్ని ఈ రోజు పురస్కరించుకుంటున్నారు. ఈ సందర్బంగా, ఆయనతో ‘చాల్బాజ్’ (1989) చిత్రంలో పనిచేసిన దర్శకుడు పంకజ్ పరాశర్ అప్పటి అందమైన జ్ఞాపకాలను పంచుకున్నారు. రజనీకాంత్ నటనపై, వినయంపై, స్టార్డమ్పై ఆయన ఆసక్తికర వ్యాఖ్యలు చేశారు. రజనీకాంత్ వంటి గొప్ప నటుడితో పనిచేసిన అనుభవాన్ని గుర్తుచేసుకుంటూ, ఆయన వ్యక్తిత్వం, నిరాడంబరత గురించి పరాశర్ మాట్లాడారు.
పరాశర్ మాట్లాడుతూ, రజనీకాంత్ అసాధారణమైన తెలివి గల నటుడు అని కొనియాడారు. “‘చాల్బాజ్’ ప్రధానంగా శ్రీదేవి కోసం రూపొందించిన సినిమా అని వెంటనే అర్థం చేసుకున్నారు. కాబట్టి తన పాత్రను హీరోయిజం దిశగా కాకుండా, పూర్తిగా కామెడీ షేడ్లోకి మార్చుకోవాలని తానే స్వయంగా సూచించారు” అని తెలిపారు. భయపడే మనిషి పాత్ర చేయడానికి సిద్ధం కావడం వంటి నిర్ణయాలను పెద్ద స్టార్లు తీసుకోవడం అరుదుగా ఉంటుందని పరాశర్ పేర్కొన్నారు. సెట్లో శ్రీదేవి వచ్చినప్పుడల్లా రజనీకాంత్ నవ్వుతూ ‘శ్రీదేవా’ అని పలకడం ఇప్పటికీ జ్ఞాపకమంటూ అన్నారు.
రజనీకాంత్ నిరాడంబరత గురించి మాట్లాడిన ఆయన, “అసిస్టెంట్, మేనేజర్ ఎవరూ ఉండరు. పాత 1960ల ఫియట్ కారులో సెట్కు వచ్చేవారు. ఒకసారి నన్ను హోటల్కు వదిలి పెట్టడానికి కూడా ముందుకొచ్చారు. ఎసీ లేని కారులో కిటికీ దిగితే అభిమానులు గుమికూడి గందరగోళం అవుతుందని చెప్పారు. నేను నమ్మలేదు. కానీ సిగ్నల్ దగ్గర కొద్దిసేపట్లోనే జనాలు చుట్టుముట్టి ట్రాఫిక్ జామ్ చేశారు. అప్పుడు ఆయన స్టార్డమ్ ఎంత విస్తృతమో నాకు అర్థమైంది” అని వివరించారు. ఈ విధంగా తన స్టార్డమ్ను చూసి ఆయన ఆశ్చర్యపోయిన సందర్భాన్ని గుర్తుచేసుకున్నారు.
