మెగాస్టార్ చిరంజీవి హీరోగా, దర్శకుడు మల్లిడి వశిష్ట తెరకెక్కిస్తున్న భారీ సోషియో ఫాంటసీ చిత్రం ‘విశ్వంభర’ కోసం అభిమానులు ఎంతో ఆసక్తిగా ఎదురుచూస్తున్నారు. అయితే ఈ సినిమా విడుదల తేదీపై మాత్రం ఇంకా స్పష్టత రాకపోవడం అభిమానుల్లో చర్చనీయాంశంగా మారింది.
మొదట ఈ సినిమాను సమ్మర్ సీజన్లో విడుదల చేయాలని మేకర్స్ ప్లాన్ చేసిన సంగతి తెలిసిందే. స్వయంగా చిరంజీవి కూడా గతంలో ఒక సందర్భంలో మాట్లాడుతూ, చిత్రంలోని విజువల్ ఎఫెక్ట్స్ పనులు కీలక దశలో ఉన్నాయని, సమ్మర్లో సినిమాను ప్రేక్షకుల ముందుకు తీసుకురావాలని భావిస్తున్నట్లు చెప్పారు. దీంతో ఫ్యాన్స్ భారీ అంచనాలు పెట్టుకున్నారు.
అయితే సమ్మర్ సీజన్ ముగిసిపోతున్నా మూవీ టీమ్ నుంచి ఎలాంటి అధికారిక రిలీజ్ డేట్ ప్రకటన రాలేదు. టీజర్ విడుదలైన తర్వాత కూడా ప్రమోషన్లు పెద్దగా కనిపించకపోవడంతో, ‘విశ్వంభర’ సమ్మర్ రేస్ నుంచి తప్పుకున్నట్లు ఇండస్ట్రీ వర్గాల్లో టాక్ వినిపిస్తోంది.
ఇక తాజా సమాచారం ప్రకారం, నిర్మాతలు ఇప్పుడు దసరా సీజన్ను టార్గెట్ చేస్తున్నట్లు తెలుస్తోంది. ప్రస్తుతం జరుగుతున్న VFX పనులు జూలై లేదా ఆగస్టు నాటికి పూర్తైతే, అక్టోబర్లో దసరా కానుకగా సినిమాను విడుదల చేసే అవకాశాలు ఉన్నాయని ప్రచారం జరుగుతోంది.
అయితే దసరా సీజన్లో పోటీ కూడా గట్టిగానే ఉండనుంది. ఇప్పటికే బాలకృష్ణ – గోపీచంద్ మలినేని కాంబినేషన్లో తెరకెక్కుతున్న సినిమా, అలాగే వెంకటేష్ – త్రివిక్రమ్ కాంబో ప్రాజెక్ట్ ‘AK47’ కూడా అదే సీజన్ను లక్ష్యంగా పెట్టుకున్నట్లు వార్తలు వస్తున్నాయి. దీంతో సీనియర్ స్టార్ హీరోల మధ్య బాక్సాఫీస్ పోటీ ఆసక్తికరంగా మారే అవకాశముంది.
ప్రస్తుతం ‘విశ్వంభర’ విడుదల తేదీపై అధికారిక ప్రకటన కోసం అభిమానులు ఎదురుచూస్తున్నారు. దసరా రిలీజ్ ప్రచారం నిజమవుతుందా? లేక మేకర్స్ మరో సర్ప్రైజ్ ప్లాన్ చేస్తున్నారా? అన్నది త్వరలోనే తేలనుంది.
