రెబల్ స్టార్ ప్రభాస్ హీరోగా, స్టార్ డైరెక్టర్ సందీప్ రెడ్డి వంగా దర్శకత్వంలో తెరకెక్కుతున్న మోస్ట్ అవేటెడ్ పాన్-వరల్డ్ ప్రాజెక్ట్ ‘స్పిరిట్’ ప్రస్తుతం సినీ వర్గాల్లో హాట్ టాపిక్గా మారింది. భారీ అంచనాల మధ్య రూపొందుతున్న ఈ చిత్రానికి తాజాగా టైటిల్ వివాదం రూపంలో ఊహించని అడ్డంకి ఎదురైనట్లు వార్తలు వినిపిస్తున్నాయి.
టీ-సిరీస్, భద్రకాళి పిక్చర్స్ బ్యానర్లపై నిర్మితమవుతున్న ఈ చిత్రం తెలుగు, హిందీ, తమిళం, మలయాళం, కన్నడతో పాటు ఇంగ్లీష్, చైనీస్, జపనీస్, కొరియన్ భాషల్లో విడుదల చేయాలని మేకర్స్ ప్లాన్ చేస్తున్నారు. ఈ చిత్రంలో ప్రభాస్కు జోడీగా బాలీవుడ్ నటి త్రిప్తి డిమ్రి నటిస్తుండగా, వివేక్ ఒబెరాయ్, ప్రకాష్ రాజ్ కీలక పాత్రలు పోషిస్తున్నారు. మరోవైపు కాజోల్ కూడా ఓ ముఖ్యమైన పాత్రలో కనిపించనున్నట్లు సమాచారం.
ఫస్ట్ టైమ్ పోలీస్గా ప్రభాస్
తన కెరీర్లో తొలిసారిగా ప్రభాస్ పవర్ఫుల్ పోలీస్ ఆఫీసర్ పాత్రలో కనిపించనుండటం అభిమానుల్లో ఆసక్తిని రెట్టింపు చేసింది. ‘అర్జున్ రెడ్డి’, ‘యానిమల్’ చిత్రాలతో సంచలనం సృష్టించిన సందీప్ రెడ్డి వంగా ఈసారి ప్రభాస్ను మరింత మాస్, ఇంటెన్స్ అవతార్లో చూపించబోతున్నారని సినీ వర్గాలు చెబుతున్నాయి. “సీరియస్ కాప్ స్టోరీ”గా రూపొందుతున్న ఈ సినిమాపై ఇప్పటికే భారీ హైప్ నెలకొంది.
‘స్పిరిట్’ టైటిల్పై వివాదం
ఇదిలా ఉంటే, ‘స్పిరిట్’ టైటిల్ చుట్టూ వివాదం చెలరేగింది. మహిళా నిర్మాత నర్సమ్మ నిర్మించిన ‘స్పిరిట్ ఈజ్ నాట్ వన్’ అనే చిత్రానికి సంబంధించిన అంశం ఇప్పుడు చర్చనీయాంశంగా మారింది.
చిన్నప్పటి నుంచి సినిమా తీయాలనే కలతో ఆస్తులు అమ్ముకుని, అప్పులు చేసి ఎంతో కష్టపడి ఈ చిత్రాన్ని నిర్మించానని నర్సమ్మ భావోద్వేగంగా వెల్లడించారు. తమ సినిమా విడుదలకు అన్ని ఏర్పాట్లు పూర్తి చేసి, సెన్సార్ ప్రక్రియ కూడా ముగించామని ఆమె తెలిపారు.
అయితే విడుదలకు సిద్ధమైన సమయంలో ప్రభాస్ ‘స్పిరిట్’ నిర్మాణ సంస్థ టీ-సిరీస్ నుంచి లీగల్ నోటీసులు రావడంతో తమ సినిమా రిలీజ్ నిలిచిపోయిందని ఆమె ఆరోపించారు. దీంతో ఆర్థికంగా తీవ్ర ఇబ్బందులు ఎదుర్కొంటున్నామని, అప్పులు ఇచ్చినవారు కూడా ఒత్తిడి తెస్తున్నారని వాపోయారు.
కోర్టుకు వెళ్తానంటున్న నిర్మాత
తమను ముందుగా సంప్రదించి ఉంటే ప్రభాస్ సినిమా కోసం ఆ టైటిల్ను సంతోషంగా ఇచ్చేవాళ్లమని నర్సమ్మ అన్నారు. కానీ ఎలాంటి చర్చలు లేకుండా నేరుగా లీగల్ నోటీసులు పంపించడం చిన్న నిర్మాతలపై ఒత్తిడి తీసుకురావడమేనని విమర్శించారు.
అవసరమైతే న్యాయం కోసం కోర్టును ఆశ్రయిస్తానని, తమకు న్యాయం జరగకపోతే ‘స్పిరిట్’ విడుదల సమయంలో కూడా చట్టపరమైన పోరాటం కొనసాగిస్తానని ఆమె స్పష్టం చేశారు.
అయితే ఈ ఆరోపణలపై ఇప్పటివరకు ప్రభాస్, సందీప్ రెడ్డి వంగా లేదా టీ-సిరీస్ అధికారికంగా స్పందించలేదు. దీంతో ఈ వివాదం ఎటువైపు మలుపు తిరుగుతుందో అన్న ఆసక్తి సినీ వర్గాల్లో నెలకొంది.
