బాక్సాఫీస్ వద్ద కలెక్షన్ల సునామీ సృష్టిస్తున్న ‘పెద్ది’ సినిమా ఇప్పుడు మరోసారి వార్తల్లో నిలిచింది. రామ్ చరణ్, బుచ్చిబాబు సానా కాంబినేషన్లో తెరకెక్కిన ఈ రూరల్ స్పోర్ట్స్ యాక్షన్ డ్రామా ప్రేక్షకులను థియేటర్లకు క్యూ కట్టిస్తోంది. ‘రంగస్థలం’, ‘ఆర్ఆర్ఆర్’ తర్వాత మరోసారి చరణ్ తన నటనతో, బాడీ లాంగ్వేజ్తో అభిమానులను ఫిదా చేస్తున్నాడు.
అయితే ఒకవైపు భారీ వసూళ్లు సాధిస్తున్న ఈ సినిమా… మరోవైపు కంటెంట్, స్క్రీన్ప్లే విషయంలో విమర్శలను కూడా ఎదుర్కొంటోంది. మొదటి రోజు నుంచే ప్రేక్షకులు, సినీ విమర్శకుల నుంచి డివైడ్ టాక్ రావడంతో దర్శకుడు బుచ్చిబాబు సానా ఈ ఫీడ్బ్యాక్ను చాలా సీరియస్గా తీసుకున్నట్లు తెలుస్తోంది. అంతేకాదు, సినిమాను మరోసారి ఎడిట్ చేస్తున్నారనే వార్తలు ఇప్పుడు టాలీవుడ్ వర్గాల్లో హాట్ టాపిక్గా మారాయి.
ఇప్పటికే సినిమాలో జాన్వీ కపూర్ పాత్రకు సంబంధించిన కొన్ని గ్లామరస్ సన్నివేశాలు, అభ్యంతరకరంగా భావించిన కొన్ని షాట్లపై సోషల్ మీడియాలో తీవ్ర విమర్శలు వచ్చాయి. హీరోయిన్ పాత్రను చూపించిన తీరుపై ప్రేక్షకులు అసంతృప్తి వ్యక్తం చేయడంతో, దర్శకుడు బుచ్చిబాబు ఎలాంటి మొహమాటం లేకుండా క్షమాపణలు చెబుతూ ఆ వివాదాస్పద సన్నివేశాలను పూర్తిగా తొలగించారు. ప్రస్తుతం థియేటర్లలో ప్రదర్శితమవుతున్న వెర్షన్లో ఆ సీన్లు కనిపించడం లేదు.
అయితే మార్పులు అక్కడితో ఆగిపోలేదట. తాజా సమాచారం ప్రకారం… సెకండాఫ్ నిడివి ఎక్కువగా ఉందని, కథనం కొంత నెమ్మదిగా సాగుతోందని ప్రేక్షకుల నుంచి వచ్చిన ఫీడ్బ్యాక్ ఆధారంగా మరిన్ని మార్పులు చేయాలని మేకర్స్ నిర్ణయించుకున్నట్లు తెలుస్తోంది.
ప్రత్యేకంగా సెకండాఫ్లో వచ్చే కొన్ని లెంగ్తీ ఫ్లాష్బ్యాక్ ఎపిసోడ్స్ను ట్రిమ్ చేసి, వాటి స్థానంలో రామ్ చరణ్, జగపతి బాబు పాత్రల మధ్య మరింత ఎమోషనల్, పవర్ఫుల్ సన్నివేశాలను జోడించే ఆలోచనలో ఉన్నారట. ఈ సీన్లు సినిమాకు మరింత బలం చేకూర్చడమే కాకుండా ప్రేక్షకుల్లో ఎమోషనల్ కనెక్ట్ను పెంచుతాయని చిత్ర యూనిట్ భావిస్తున్నట్లు సమాచారం.
సినిమాలోని లాగ్స్ను తొలగించి, స్క్రీన్ప్లేను మరింత గ్రిప్పింగ్గా మార్చేందుకు ఎడిటింగ్ రూమ్లో ప్రత్యేకంగా కసరత్తు జరుగుతోందట. ‘ఉప్పెన’ సినిమాతో క్లాసిక్ హిట్ అందుకున్న బుచ్చిబాబు… ఈసారి ‘పెద్ది’ని మరింత ఎంటర్టైనింగ్గా ప్రేక్షకుల ముందుకు తీసుకురావాలని ప్రయత్నిస్తున్నాడు.
మైత్రీ మూవీ మేకర్స్, వృద్ధి సినిమాస్ సంయుక్తంగా నిర్మించిన ఈ భారీ బడ్జెట్ చిత్రానికి సంబంధించిన కొత్త ఎడిటెడ్ వెర్షన్ను మళ్లీ సెన్సార్ బోర్డు ముందుకు తీసుకెళ్లనున్నట్లు టాక్ వినిపిస్తోంది. రీ-సెన్సార్ ప్రక్రియ పూర్తి చేసి, జూన్ 12లోపు ఈ అప్డేటెడ్ వెర్షన్ను థియేటర్లలో విడుదల చేయాలని నిర్మాతలు ప్లాన్ చేస్తున్నారట.
మరి ఈ కొత్త మార్పులు ‘పెద్ది’ సినిమాకు ఎంతవరకు ప్లస్ అవుతాయి? బాక్సాఫీస్ వద్ద మరింత భారీ విజయాన్ని అందిస్తాయా? అనేది చూడాలి.
