నటి, నిర్మాత మంచు లక్ష్మి తన కుటుంబంలో జరిగిన విభేదాలపై తొలిసారి బహిరంగంగా స్పందించారు. ఇటీవల ఒక పాడ్కాస్ట్ ఇంటర్వ్యూలో పాల్గొన్న ఆమె, తన కుటుంబం పాతలాగే మళ్లీ సంతోషంగా కలిసి ఉండాలని ఆకాంక్షిస్తూ భావోద్వేగానికి గురయ్యారు. ఈ సందర్భంగా, తనకు దేవుడు ఏదైనా వరం ఇస్తే, తన కుటుంబం అంతా సంతోషంగా కలిసి ఉండాలని మాత్రమే కోరుకుంటానని ఆమె వెల్లడించారు.
ప్రతి కుటుంబంలో గొడవలు సహజమే అయినప్పటికీ, ఎన్ని అడ్డంకులు వచ్చినా చివరికి అందరూ ఒక్కటిగా ఉండాలనే దృక్పథాన్ని ఆమె వ్యక్తం చేశారు. కష్టకాలంలో మనకు అండగా నిలిచేది రక్తసంబంధీకులేనని, వారితో కలిసి ఉండటానికి ఎంతటి పోరాటమైనా చేయాలి కానీ, దూరం పెంచుకోకూడదని ఆమె గట్టిగా నొక్కి చెప్పారు. ఈ వివాదాల సమయంలో తాను ఎంత మానసిక వేదన అనుభవించానో తనకు మాత్రమే తెలుసని, బాధను అందరికీ ప్రదర్శించాల్సిన అవసరం లేదనే ఉద్దేశంతోనే మౌనంగా ఉన్నట్లు ఆమె స్పష్టం చేశారు.
సినిమా ప్రమోషన్ల సమయంలో తప్ప, వ్యక్తిగత ఇంటర్వ్యూలు ఇవ్వడానికి తాను ఇష్టపడనని తెలిపిన మంచు లక్ష్మి, కుటుంబంలో ఎన్నో బాధ్యతలు నిర్వర్తిస్తున్నానని, ముఖ్యంగా ఒక తల్లిగా తనకు తాను 10కి 10 మార్కులు వేసుకుంటానని పేర్కొన్నారు. కుటుంబ కలయికకు ప్రాధాన్యత ఇస్తూ ఆమె చేసిన ఈ వ్యాఖ్యలు ప్రస్తుతం చర్చనీయాంశమయ్యాయి.
