రెబల్ స్టార్ ప్రభాస్ హీరోగా, సంచలన దర్శకుడు సందీప్ రెడ్డి వంగా దర్శకత్వంలో తెరకెక్కుతున్న పాన్-ఇండియా చిత్రం ‘స్పిరిట్’ పై దేశవ్యాప్తంగా భారీ అంచనాలు నెలకొన్నాయి. ‘అర్జున్ రెడ్డి’, ‘కబీర్ సింగ్’, ‘యానిమల్’ వంటి చిత్రాలతో తనదైన ముద్ర వేసిన సందీప్ వంగా, ఈసారి ప్రభాస్ను పూర్తిగా భిన్నమైన శైలిలో చూపించబోతున్నారని సమాచారం. ఈ సినిమాకు సంబంధించిన ప్రీ-ప్రొడక్షన్ పనులు పూర్తయి, పూజా కార్యక్రమాలు ఘనంగా నిర్వహించారు. ఈ నెల చివరిలో రెగ్యులర్ షూటింగ్ ప్రారంభించేందుకు చిత్ర బృందం సన్నాహాలు చేస్తోంది.
ఈ చిత్రంలో హీరోయిన్గా బాలీవుడ్ నటి త్రిప్తి దిమ్రి నటిస్తోంది. అదనంగా, ప్రముఖ నటులు ప్రకాశ్ రాజ్, సీనియర్ నటి కాంచన ముఖ్య పాత్రల్లో కనిపించనున్నారు. ముఖ్యంగా, బాలీవుడ్ నటుడు వివేక్ ఒబెరాయ్ విలన్గా నటిస్తుండగా, కొరియా నటుడు డాన్ లీ కూడా ఒక కీలక పాత్ర పోషించనున్నాడు. సందీప్ రెడ్డి వంగా సినిమాల్లో ప్రతినాయక పాత్రలకు ఉన్న ప్రాధాన్యత దృష్ట్యా, ఈ సినిమాలో విలన్ పాత్రల డిజైనింగ్ పైనా అంచనాలు పెరిగాయి. ఈ అంతర్జాతీయ నటీనటుల కలయికతో సినిమాకు గ్లోబల్ లుక్ రానుందని టాక్.
ఇక తాజాగా, ఈ సినిమాకు సంబంధించి మరో ఆసక్తికరమైన వార్త సోషల్ మీడియాలో చక్కర్లు కొడుతోంది. దగ్గుబాటి కుటుంబానికి చెందిన హీరో అభిరామ్ దగ్గుబాటి ఈ చిత్రంలో ఒక కీలక పాత్రలో నటించనున్నారట. అభిరామ్ పోషించే పాత్రకు యారోగెన్సీ, పవర్ఫుల్ యాటిట్యూడ్, మాస్ ప్రెజెన్స్ ఉంటాయని ప్రచారం జరుగుతోంది. దర్శకుడు సందీప్ రెడ్డి వంగా స్వయంగా అభిరామ్ను ఈ పాత్ర కోసం సంప్రదించారని ఇండస్ట్రీ టాక్. ‘అహింస’ చిత్రం ఆశించిన విజయాన్ని సాధించకపోయినా, ప్రభాస్ లాంటి భారీ ప్రాజెక్ట్లో అవకాశం దక్కితే అది అభిరామ్ కెరీర్కు ఒక టర్నింగ్ పాయింట్గా మారుతుందని సినీ వర్గాలు భావిస్తున్నాయి. అయితే, ఈ విషయంపై అధికారిక ప్రకటన ఇంకా రాలేదు.
