భారత ప్రభుత్వం ప్రకటించిన 2026 పద్మ పురస్కారాలలో తెలుగు సినీ పరిశ్రమకు చెందిన ఇద్దరు దిగ్గజ నటులు, నటకిరీటి రాజేంద్ర ప్రసాద్ మరియు మాగంటి మురళీ మోహన్లను ‘పద్మశ్రీ’ అవార్డు వరించింది. కళా విభాగంలో దశాబ్దాలుగా వారు అందించిన విశేష సేవలను గుర్తిస్తూ కేంద్రం ఈ అత్యున్నత గౌరవాన్ని ప్రకటించింది. ఈ వార్త తెలియగానే తెలుగు రాష్ట్రాల్లోని అభిమానులు, సినీ ప్రముఖులు హర్షం వ్యక్తం చేస్తూ, ఇది “లేట్గా వచ్చినా.. లేటెస్ట్గా వచ్చిన గౌరవం” అని కొనియాడుతున్నారు.
ఈ పురస్కారంపై రాజేంద్ర ప్రసాద్ స్పందిస్తూ, ఇది కేవలం తనకు దక్కిన గౌరవం మాత్రమే కాదని, తెలుగు హాస్యాన్ని ప్రేమించే ప్రతి సామాన్య ప్రేక్షకుడికి దక్కిన గౌరవంగా భావిస్తున్నట్లు తెలిపారు. సుమారు 48 ఏళ్ల తన సినీ ప్రస్థానంలో ప్రేక్షకులు అందించిన ఆదరణే తనను ఈ స్థాయికి చేర్చిందని, ఈ అవార్డును అభిమానులకే అంకితం ఇస్తున్నట్లు ఆయన భావోద్వేగంగా పేర్కొన్నారు. కామెడీ కింగ్గా వందలాది చిత్రాలతో మెప్పించిన ఆయనకు దక్కిన ఈ గుర్తింపు పట్ల ఇండస్ట్రీ వర్గాలు ప్రత్యేకంగా అభినందనలు తెలియజేస్తున్నాయి.
మరోవైపు సీనియర్ నటుడు, మాజీ ఎంపీ మురళీ మోహన్ కూడా కేంద్ర ప్రభుత్వానికి తన కృతజ్ఞతలు తెలిపారు. ఐదు దశాబ్దాల సినీ ప్రయాణంలో నటుడిగా, నిర్మాతగా ఎన్నో సామాజిక స్పృహ కలిగిన చిత్రాలను అందించిన ఆయన, రాజకీయ మరియు సేవా రంగాల్లోనూ తన ముద్ర వేశారు. తనకు దక్కిన ఈ గౌరవంపై స్పందిస్తూ.. “అన్నీ మనం అనుకున్నప్పుడే రావు, కానీ వేచి చూసిన తర్వాత వచ్చే గుర్తింపు విలువ ఎప్పుడూ ఎక్కువే ఉంటుంది” అని మురళీ మోహన్ వ్యాఖ్యానించారు. ఈ ఇద్దరు మహానుభావులకు పద్మశ్రీ దక్కడం తెలుగు గడ్డ గర్వించదగ్గ పరిణామం.
