‘డర్’ ఆఫర్ను తిరస్కరించిన రవీనా
బాలీవుడ్ స్టార్ హీరో షారుఖ్ ఖాన్ కెరీర్ను మలుపు తిప్పిన చిత్రాల్లో ఒకటైన ‘డర్’ (Darr) సినిమాకు సంబంధించి నటి రవీనా టాండన్ ఆసక్తికర విషయాన్ని వెల్లడించారు. 1993లో దిగ్గజ దర్శకుడు యశ్ చోప్రా దర్శకత్వంలో వచ్చిన ఈ చిత్రంలో కథానాయిక పాత్ర కోసం చిత్రబృందం మొదటగా తననే సంప్రదించిందని ఆమె తెలిపారు. అయితే, ఈ ఆఫర్ను తాను తిరస్కరించానని, ఆ సినిమా విడుదలై 32 ఏళ్లు గడిచిన తర్వాత ఆమె ఈ విషయాన్ని బయటపెట్టడం గమనార్హం.
స్విమ్సూట్ ధరించడానికి ఇష్టపడకే..
‘డర్’ సినిమా ఆఫర్ను తిరస్కరించడానికి గల కారణాన్ని రవీనా టాండన్ వివరించారు. “ఆ సినిమాలో కొన్ని సన్నివేశాలు నాకు అసౌకర్యంగా అనిపించాయి. ముఖ్యంగా ఓ సన్నివేశంలో స్విమ్సూట్ ధరించాలని చిత్రబృందం కోరింది. నాకంటూ కొన్ని నియమాలు ఉండటంతో కాస్ట్యూమ్స్ విషయంలో నేను రాజీపడలేకపోయాను. అందుకే ఆ సినిమా ఆఫర్ను సున్నితంగా తిరస్కరించాను” అని ఆమె తెలిపారు. కాస్ట్యూమ్స్ విషయంలో తనకు ఉన్న నిబంధనల కారణంగానే ఆ భారీ ప్రాజెక్ట్ను వదులుకోవాల్సి వచ్చిందని ఆమె స్పష్టం చేశారు.
జుహీ చావ్లాకు దక్కిన అవకాశం
రవీనా టాండన్ ఈ ఆఫర్ను తిరస్కరించిన తర్వాత, ఆ అవకాశం నటి జుహీ చావ్లాకు దక్కింది. ‘డర్’ చిత్రంలో సన్నీ డియోల్ కథానాయకుడిగా నటించగా, షారుఖ్ ఖాన్ విలన్ పాత్రలో అద్భుతంగా నటించి ప్రశంసలు అందుకున్నారు. ఈ సినిమా బాక్సాఫీస్ వద్ద భారీ విజయం సాధించడమే కాకుండా, షారుఖ్కు ఉత్తమ విలన్గా ఫిల్మ్ఫేర్ అవార్డును కూడా తెచ్చిపెట్టింది. రవీనా టాండన్ సున్నితంగా తిరస్కరించిన ఈ చిత్రం బాలీవుడ్ చరిత్రలో ఒక మైలురాయిగా నిలిచింది.
