సల్మాన్ ఖాన్ హీరోగా 2020 నాటి గల్వాన్ లోయ ఘర్షణల నేపథ్యంలో తెరకెక్కుతున్న ప్రతిష్టాత్మక చిత్రానికి మేకర్స్ సరికొత్త టైటిల్ను ఖరారు చేశారు. గతంలో ‘బ్యాటిల్ ఆఫ్ గల్వాన్’ అని పిలిచిన ఈ సినిమా పేరును ఇప్పుడు ‘మాతృభూమి: మే వార్ రెస్ట్ ఇన్ పీస్’ (Matrubhoomi: May War Rest in Peace) గా మారుస్తూ సల్మాన్ ఖాన్ ఫిల్మ్స్ సోమవారం అధికారికంగా ప్రకటించింది. కొత్త టైటిల్తో పాటు యుద్ధానికి వ్యతిరేకంగా శాంతిని కాంక్షించే బలమైన సందేశంతో విడుదల చేసిన పోస్టర్ నెట్టింట వైరల్ అవుతోంది.
ఈ చిత్రంలో సల్మాన్ ఖాన్ వీరమరణం పొందిన కల్నల్ సంతోష్ బాబు పాత్రలో నటిస్తున్నారు. అపూర్వ లఖియా దర్శకత్వంలో రూపొందుతున్న ఈ చిత్రం 16వ బీహార్ రెజిమెంట్కు చెందిన సైనికుల ధైర్యసాహసాలను కళ్లకు కట్టనుంది. వాస్తవ నియంత్రణ రేఖ (LAC) వద్ద చైనా సైనికులతో జరిగిన పోరాటాన్ని, ఆ సమయంలో భారత సైన్యం చూపిన తెగువను ఈ సినిమాలో ప్రధానంగా చూపించనున్నారు. చిత్రంలో సల్మాన్ రగ్డ్డ్ లుక్లో, సైనికుడి గెటప్లో కనిపిస్తుండటం విశేషం.
ఈ ప్రతిష్టాత్మక ప్రాజెక్టులో సల్మాన్ సరసన చిత్రాంగద సింగ్ కథానాయికగా నటిస్తుండగా, హిమేష్ రేషమియా సంగీతాన్ని అందిస్తున్నారు. అభిలాష్ చౌదరి, అంకుర్ భాటియా కీలక పాత్రలు పోషిస్తున్నారు. దేశభక్తి మరియు యుద్ధ నేపథ్యంలో సాగే ఈ చిత్రం ప్రస్తుత అంతర్జాతీయ పరిస్థితుల మధ్య మరింత ప్రాధాన్యతను సంతరించుకుంది. సల్మాన్ కెరీర్లో ఇది మరో మైలురాయిగా నిలుస్తుందని విశ్లేషకులు భావిస్తున్నారు.
