ది హండ్రెడ్’ లీగ్లో కావ్య మారన్కు చెందిన ‘సన్రైజర్స్ లీడ్స్’ జట్టు, పాకిస్థాన్ స్పిన్నర్ అబ్రార్ అహ్మద్ను సుమారు రూ.2.3 కోట్లకు కొనుగోలు చేయడం తీవ్ర వివాదానికి దారితీసింది. ఈ నేపథ్యంలో సునీల్ గవాస్కర్ స్పందిస్తూ సంచలన వ్యాఖ్యలు చేశారు. పాకిస్థాన్ ఆటగాడిని కొనుగోలు చేయడం ద్వారా అతనికి చెల్లించే డబ్బు ఆదాయపు పన్ను రూపంలో ఆ దేశ ప్రభుత్వానికి చేరుతుందని, ఆ నిధులను ఆయుధాల కొనుగోలుకు మళ్లించి చివరకు భారత సైనికులు, పౌరుల ప్రాణాలను తీసేందుకు ఉపయోగిస్తారని గవాస్కర్ మండిపడ్డారు.
ముంబై దాడుల తర్వాత ఐపీఎల్ ఫ్రాంచైజీలు పాక్ ఆటగాళ్లను దూరం పెట్టాయని గుర్తు చేస్తూ, విదేశీ లీగ్లోనైనా భారతీయ యజమానులు పాక్ క్రికెటర్లను తీసుకోవడం సరికాదని గవాస్కర్ అభిప్రాయపడ్డారు. జట్టు కోచ్ డేనియల్ వెట్టోరీకి భారత్-పాక్ మధ్య ఉన్న సున్నితమైన పరిస్థితులు అర్థం కాకపోవచ్చని, కానీ యజమానిగా కావ్య మారన్ ఈ నిర్ణయాన్ని అడ్డుకోవాల్సిందని ఆయన పేర్కొన్నారు. కేవలం ఒక టోర్నమెంట్ గెలవడం భారతీయ పౌరుల ప్రాణాల కంటే ముఖ్యం కాదని ఆయన తన కాలమ్లో స్పష్టం చేశారు.
గత ఏడాది పహల్గాంలో జరిగిన ఉగ్రదాడుల నేపథ్యంలో సోషల్ మీడియాలో కూడా కావ్య మారన్ నిర్ణయంపై నెటిజన్లు తీవ్రంగా విమర్శిస్తున్నారు. సన్రైజర్స్ హైదరాబాద్ ఫ్రాంచైజీకి ఉన్న బ్రాండ్ ఇమేజ్పై కూడా ఈ ప్రభావం పడుతుందని అభిమానులు ఆందోళన వ్యక్తం చేస్తున్నారు. ఈ వివాదంపై సన్రైజర్స్ యాజమాన్యం ఇప్పటివరకు అధికారికంగా స్పందించలేదు.
