అందమైన, ఒత్తైన జుట్టు కావాలని ప్రతి ఒక్కరూ కోరుకుంటారు, కానీ మనకు తెలియకుండానే మనం చేసే కొన్ని చిన్న చిన్న అలవాట్లు జుట్టు ఆరోగ్యాన్ని పూర్తిగా దెబ్బతీస్తాయని ప్రముఖ నిపుణులు డాక్టర్ గౌతమ్ యలమూడి హెచ్చరిస్తున్నారు. ముఖ్యంగా వేడి నీళ్లతో తలస్నానం చేయడం జుట్టుకు చేసే అతిపెద్ద నష్టం. వేడి నీటి వల్ల స్కాల్ప్పై ఉండే సహజ సిద్ధమైన నూనెలు నశించి, జుట్టు పొడిగా మారి కుదుళ్ల నుంచి బలహీనపడి రాలిపోతుంది. అందుకే ఎప్పుడూ గోరువెచ్చని లేదా చల్లని నీటితోనే స్నానం చేయడం ఉత్తమమని ఆయన సూచిస్తున్నారు.
జుట్టు శుభ్రత కోసం ప్రతిరోజూ షాంపూ వాడటం కూడా జుట్టుకు ముప్పేనని డాక్టర్ వెల్లడించారు. షాంపూలలో ఉండే రసాయనాలు తల భాగంలోని తేమను పూర్తిగా హరించి, వెంట్రుకలు జీవం కోల్పోయేలా చేస్తాయి. అందుకే వారానికి నాలుగు సార్ల కంటే ఎక్కువగా షాంపూ చేయకూడదని, తక్కువ గాఢత ఉన్న షాంపూలను ఎంచుకోవాలని ఆయన సలహా ఇస్తున్నారు. దీనివల్ల జుట్టులో సహజసిద్ధమైన తేమ అలాగే ఉండి, కురులు మెరుస్తూ ఆరోగ్యంగా ఉంటాయి. అలాగే తడి జుట్టుతో ఉన్నప్పుడు కుదుళ్లు బలహీనంగా ఉంటాయని, ఆ సమయంలో దువ్వడం వల్ల జుట్టు సులభంగా ఊడిపోతుందని ఆయన పేర్కొన్నారు.
మనం తీసుకునే ఆహారం కూడా జుట్టు ఆరోగ్యంపై నేరుగా ప్రభావం చూపుతుంది. ప్రోటీన్లు తక్కువగా ఉండి, చక్కెర అధికంగా ఉండే స్వీట్లు, కూల్ డ్రింక్స్, మైదా వంటి పదార్థాలు తీసుకోవడం వల్ల జుట్టు కుదుళ్లు బలహీనపడతాయి. జుట్టు ఒత్తుగా పెరగాలంటే ఆహారంలో ప్రోటీన్ సమృద్ధిగా ఉండే గుడ్లు, పప్పు ధాన్యాలు, ఆకుకూరలు తప్పనిసరిగా చేర్చుకోవాలి. వీటితో పాటు చుండ్రు సమస్యను నిర్లక్ష్యం చేయకుండా సరైన చికిత్స తీసుకోవడం వల్ల జుట్టు రాలడాన్ని తగ్గించి, కురులను బలంగా మార్చుకోవచ్చని నిపుణులు స్పష్టం చేస్తున్నారు.
