‘ప్రేమదేశం’ సినిమాతో రాత్రికి రాత్రే స్టార్డమ్ తెచ్చుకున్న చాక్లెట్ బాయ్ అబ్బాస్, సుమారు 11 ఏళ్ల సుదీర్ఘ విరామం తర్వాత మళ్లీ సినిమాల్లోకి వస్తున్నారు. 2015లో వచ్చిన ‘పచ్చకల్లం’ తర్వాత వ్యక్తిగత కారణాలతో న్యూజిలాండ్లో స్థిరపడిన ఆయన, ఇప్పుడు జీవీ ప్రకాష్ కుమార్ కథానాయకుడిగా నటించిన ‘హ్యాపీ రాజ్’ చిత్రంతో తన సెకండ్ ఇన్నింగ్స్ ప్రారంభిస్తున్నారు. ఈ యూత్ఫుల్ ఎంటర్టైనర్లో అబ్బాస్ ఒక కీలక పాత్రలో నటించగా, తాజాగా విడుదలైన ఈ చిత్ర ట్రైలర్ ఆయన అభిమానుల్లో కొత్త ఉత్సాహాన్ని నింపింది.
ఈ సినిమా తెలుగు ట్రైలర్ను టాలీవుడ్ మాస్ మహారాజా రవితేజ విడుదల చేశారు. ట్రైలర్ లాంచ్ ఈవెంట్లో దర్శకుడు మరియా రాజా మాట్లాడుతూ, అబ్బాస్ మళ్లీ నటించడానికి సరైన కథ కోసం చాలా కాలంగా వేచి చూశారని తెలిపారు. న్యూజిలాండ్లో ఉన్న అబ్బాస్కు ఆన్లైన్ ద్వారా కథ వినిపించగా, ఇది తన రీ-ఎంట్రీకి పర్ఫెక్ట్ స్క్రిప్ట్ అని ఆయన వెంటనే గ్రీన్ సిగ్నల్ ఇచ్చారని వెల్లడించారు. ట్రైలర్లో అబ్బాస్ తన పాత చరిష్మాను ఏమాత్రం కోల్పోకుండా, ఫుల్ లెన్త్ రోల్లో కనిపిస్తుండటం విశేషం.
మైత్రీ మూవీ డిస్ట్రిబ్యూటర్స్ ఈ చిత్రాన్ని మార్చి 27న తెలుగు రాష్ట్రాల్లో గ్రాండ్గా విడుదల చేస్తున్నారు. శ్రీ గౌరీ ప్రియ హీరోయిన్గా నటించిన ఈ సినిమాలో జార్జ్ మేరియన్ తదితరులు ముఖ్య పాత్రలు పోషించారు. హైదరాబాద్లో జరిగిన ఈ వేడుకకు దర్శకులు వెంకీ అట్లూరి, శివ నిర్వాణ హాజరై చిత్ర యూనిట్కు శుభాకాంక్షలు తెలిపారు. 90వ దశకంలో అమ్మాయిల కలల రాజకుమారుడిగా పేరు తెచ్చుకున్న అబ్బాస్, తన రెండో ఇన్నింగ్స్లో ఎలాంటి మ్యాజిక్ చేస్తారోనని సినీ ప్రియులు ఆసక్తిగా ఎదురుచూస్తున్నారు.
