ఎస్.ఎస్. రాజమౌళి రూపొందించిన ‘బాహుబలి: ది ఎపిక్’ సినిమా అక్టోబర్ 31న ప్రపంచవ్యాప్తంగా విడుదల కాబోతోంది. ‘బాహుబలి 1’ మరియు ‘బాహుబలి 2’ చిత్రాలను కలిపి ఒకే సినిమాగా థియేటర్లలోకి తీసుకొస్తుండటంతో, ప్రభాస్ అభిమానులతో పాటు యావత్ సినీ ప్రేక్షకులు ఈ సినిమాపై తీవ్ర ఆసక్తి కనబరుస్తున్నారు. బుక్మైషోలో ఈ సినిమాకు నెలకొన్న హైప్ ఈ విషయం తెలియజేస్తుంది. అయితే, ఈ భారీ హైప్ కారణంగా, అదే వారంలో విడుదల కావాల్సిన ఇతర చిత్రాల విడుదల తేదీలపై తీవ్ర ప్రభావం పడింది. ఈ ‘బాహుబలి’ ఇంపాక్ట్కు భయపడి మరో రెండు సినిమాలు వెనక్కి తగ్గాయని సినీ అభిమానులు భావిస్తున్నారు.
ముందుగా, రవితేజ నటించిన ‘మాస్ జాతర’ సినిమాను అక్టోబర్ 31వ తేదీనే విడుదల చేయాలని నిర్మాత సూర్యదేవర నాగవంశీ అనుకున్నారు. అయితే, ‘బాహుబలి: ది ఎపిక్’ అడ్వాన్స్ బుకింగ్స్ ట్రెండ్ను గమనించిన తర్వాత, బాక్సాఫీస్ వద్ద ఇబ్బందులు తప్పవని నిర్ణయించుకుని విడుదల తేదీని మార్చుకున్నారు. దీంతో ఈ సినిమా అక్టోబర్ 31 సాయంత్రం 6 గంటలకు ప్రీమియర్ షోలు వేసి, నవంబర్ 1న మార్నింగ్ షోలతో ప్రపంచవ్యాప్తంగా విడుదల కానుంది.
‘బాహుబలి: ది ఎపిక్’ ప్రభావంతో వాయిదా పడిన మరో చిత్రం విష్ణు విశాల్, శ్రద్ధా శ్రీనాథ్ నటించిన తమిళ డబ్బింగ్ మూవీ ‘ఆర్యన్’. ఈ ఇన్వెస్టిగేటివ్ క్రైమ్ థ్రిల్లర్ను అక్టోబర్ 31న తెలుగు, తమిళ భాషల్లో ఏకకాలంలో విడుదల చేయాలని మొదట ప్రకటించారు. అయితే, చివరకు తెలుగు వెర్షన్ను వాయిదా వేయాలని నిర్ణయించుకున్నారు. ఈ విషయాన్ని ధృవీకరిస్తూ విష్ణు విశాల్, “సినిమా అనేది రేస్ కాదు, సెలబ్రేషన్” అని పేర్కొన్నారు. రవితేజ, రాజమౌళి సినిమాలకు మద్దతుగా, తన సినిమాకు ప్రత్యేక స్థానం ఉండాలనే ఉద్దేశంతో ‘ఆర్యన్’ తెలుగు వెర్షన్ను వారం ఆలస్యంగా, నవంబర్ 7న విడుదల చేయనున్నట్లు ప్రకటించారు. బాహుబలి విడుదలై ఇన్నేళ్లయినా ఇంకా దాని క్రేజ్ తగ్గలేదంటే, ఆ సినిమా ఇంపాక్ట్ ఎంత ఉందో అర్థం చేసుకోవచ్చని సినీ విశ్లేషకులు చెబుతున్నారు.
