సౌందర్యరాశి ఐశ్వర్య రాయ్ బచ్చన్ ఈరోజు (నవంబర్ 1) తన 52వ పుట్టినరోజు జరుపుకుంటున్నారు. 1994లో ప్రపంచ సుందరి కిరీటం గెలుచుకున్న నాటి నుంచి నేటి వరకు ఆమె గ్రేస్ ఏమాత్రం తగ్గలేదు. ఇంత బిజీ షెడ్యూల్లోనూ, బహుళ పాత్రలు పోషిస్తూ కూడా ఆమె అందం ఎలా మెరిసిపోతుందనేది చాలామందికి ఆసక్తి కలిగించే విషయం.
తన చెక్కుచెదరని సౌందర్యం వెనుక పెద్దగా ఖరీదైన ఉత్పత్తులు గానీ, సుదీర్ఘమైన స్కిన్కేర్ రొటీన్లు గానీ లేవని ఐశ్వర్య స్పష్టం చేశారు. ఆమె ప్రకారం, అందంగా కనిపించడానికి ముఖ్యమైనవి రెండే: ఒకటి శరీరాన్ని హైడ్రేట్గా ఉంచుకోవడం, రెండోది పరిశుభ్రంగా ఉండటం. ఈ రెండూ పాటిస్తే చర్మం దానంతట అదే ఆరోగ్యంగా, కాంతివంతంగా కనిపిస్తుందని ఆమె అభిప్రాయపడ్డారు.
ఈ సాధారణ సూత్రాలతో పాటు, మాయిశ్చరైజింగ్ తన జీవితంలో ఒక భాగమైపోయిందని ఐశ్వర్య తెలిపారు. సినిమా రంగంలోకి అడుగుపెట్టిన తొలినాళ్ల నుంచే మాయిశ్చరైజింగ్ చేయడం అలవాటైందని, ఇది ఇప్పుడు తన దినచర్యలో సహజమైన భాగమని ఆమె పేర్కొన్నారు. రోజు మొదట్లో, ముగింపులో తప్పనిసరిగా మాయిశ్చరైజర్ వాడతానని ఆమె వివరించారు. సింప్లిసిటీ, స్వీయ సంరక్షణ, ఆత్మవిశ్వాసం ఉంటే వయసుతో సంబంధం లేకుండా ప్రకాశవంతంగా కనిపించవచ్చని ఆమె నిరూపిస్తున్నారు.
