కోలీవుడ్ స్టార్ హీరో సూర్య ప్రస్తుతం వరుస సినిమాలతో బిజీగా ఉన్నారు. ఇప్పటికే తన 47వ సినిమాగా ‘సీన్’ తెరకెక్కుతుండగా, ఈ చిత్రం తమిళం, తెలుగు భాషల్లో ప్రేక్షకుల ముందుకు రావడానికి సిద్ధమవుతోంది. మరోవైపు ఆయన 48వ సినిమా కూడా ఇప్పటికే ప్రారంభమైంది.
ఇదిలా ఉంటే సూర్య తన కెరీర్‌లో ఎంతో ప్రత్యేకమైన 50వ సినిమా కోసం ఇప్పటి నుంచే ప్లానింగ్ చేస్తున్నట్లు తెలుస్తోంది. ఈ మైలురాయి చిత్రానికి సంబంధించిన దర్శకుడి విషయంలో తాజాగా ఒక ఆసక్తికరమైన వార్త కోలీవుడ్‌లో వైరల్ అవుతోంది.
తాజాగా వినిపిస్తున్న రూమర్ల ప్రకారం సూర్య 50వ సినిమాకు దర్శకుడు అరుణ్ మాదేశ్వరన్ దర్శకత్వం వహించే అవకాశం ఉందట. ఈ కాంబినేషన్‌పై అధికారిక ప్రకటన రాకపోయినప్పటికీ, ఈ వార్త అభిమానుల్లో ఆసక్తిని పెంచుతోంది.
ఈ ఏడాది ‘డీసీ’ సినిమాతో అరుణ్ మాదేశ్వరన్ మంచి గుర్తింపు తెచ్చుకున్నారు. యాక్షన్ డ్రామాను తనదైన శైలిలో, అద్భుతమైన మ్యూజిక్‌తో తెరకెక్కించడంతో ప్రేక్షకుల నుంచి మంచి స్పందన లభించింది.
ఇలాంటి దర్శకుడితో సూర్య తన 50వ సినిమా చేస్తే ఆ ప్రాజెక్టుపై అంచనాలు ఏ స్థాయిలో ఉంటాయో ప్రత్యేకంగా చెప్పాల్సిన అవసరం లేదు.
మరి నిజంగానే సూర్య 50వ సినిమాకు అరుణ్ మాదేశ్వరన్ దర్శకత్వం వహిస్తారా? లేక ఈ మైలురాయి చిత్రం కోసం మరో దర్శకుడిని ఎంచుకుంటారా? అనేది తెలియాలంటే అధికారిక ప్రకటన వచ్చే వరకు వేచి చూడాల్సిందే!
