ఒకప్పుడు పౌరాణిక సినిమాలకు టాలీవుడ్, కోలీవుడ్లో మంచి క్రేజ్ ఉండేది. కానీ కాలక్రమేణా యాక్షన్, కమర్షియల్, థ్రిల్లర్ లాంటి జానర్లు ఆ స్థానాన్ని భర్తీ చేశాయి. అయితే ఇప్పుడు టెక్నాలజీ రోజురోజుకీ కొత్త పుంతలు తొక్కుతుండటంతో.. మళ్లీ పౌరాణిక కథలను భారీ విజువల్స్తో వెండితెరపై ఆవిష్కరించేందుకు మేకర్స్ రెడీ అవుతున్నారు.
అందులో భాగంగానే ఇప్పుడు హీరో, డైరెక్టర్, కొరియోగ్రాఫర్గా తనకంటూ ప్రత్యేక గుర్తింపు తెచ్చుకున్న రాఘవ లారెన్స్ కూడా ఓ భారీ పౌరాణిక చిత్రంతో ప్రేక్షకుల ముందుకు రాబోతున్నారు.
‘మహావీర్ కర్ణ’గా లారెన్స్!
రాఘవ లారెన్స్ తొలిసారి పౌరాణిక పాత్రలో కనిపించబోతున్న ఈ సినిమాకు రమేష్ వర్మ దర్శకత్వం వహిస్తున్నారు. తాజాగా ఈ మూవీ ఫస్ట్ లుక్ను మేకర్స్ విడుదల చేయగా.. అందులో లారెన్స్ కర్ణుడి పాత్రలో కనిపించడం అందరి దృష్టిని ఆకర్షిస్తోంది.
ఇప్పటివరకు కామెడీ, యాక్షన్, మాస్, హారర్ వంటి విభిన్న జానర్లలో తనదైన స్టైల్ చూపించిన లారెన్స్.. ఇప్పుడు పూర్తిగా భిన్నమైన అవతార్లో కనిపించనుండటంతో ఈ సినిమా ఎలా ఉండబోతుందనే ఆసక్తి మొదలైంది.
రూ.150 కోట్ల భారీ బడ్జెట్!
ఇక ఈ సినిమాను పెన్ మూవీస్ అధినేత జయంతిలాల్ గడ, ఆర్వి స్టూడియోస్, శ్రీ నీలాద్రి ప్రొడక్షన్స్ సంయుక్తంగా నిర్మిస్తున్నట్లు సమాచారం. దాదాపు రూ.150 కోట్ల భారీ బడ్జెట్తో ఈ సినిమాను రూపొందిస్తున్నారనే వార్తలు వినిపిస్తున్నాయి.
పాన్ ఇండియా స్థాయిలో తెరకెక్కుతున్న ఈ చిత్రం తెలుగు, తమిళం, హిందీ, కన్నడ, మలయాళ భాషల్లో ప్రేక్షకుల ముందుకు రానుందని తెలుస్తోంది.
కర్ణుడి కథను కేవలం ఒక పాత్ర చుట్టూ నడిపించడం కాకుండా.. ఆ కాలాన్ని కళ్లకు కట్టినట్లు చూపించేందుకు మేకర్స్ భారీగా ప్లాన్ చేస్తున్నారట. పురాతన రాజ్యాలు, యుద్ధభూములు, భారీ సైన్యాలు, ఆయుధాలు, రాజభవనాలు వంటి వాటి కోసం భారీ సెట్లు రూపొందిస్తున్నట్లు సమాచారం.
అంతేకాదు.. యుద్ధ సన్నివేశాలు, విజువల్ ఎఫెక్ట్స్ విషయంలో కూడా ఎక్కడా తగ్గకుండా గ్రాండ్గా తెరకెక్కించాలని మేకర్స్ ప్లాన్ చేస్తున్నారట. దీంతో థియేటర్లలో ఆడియన్స్కు ఒక భారీ విజువల్ ఎక్స్పీరియన్స్ అందించాలనే లక్ష్యంతో సినిమా రూపొందుతున్నట్లు తెలుస్తోంది.
ఇక ఈ సినిమాలో నటించబోయే మిగతా నటీనటులు, టెక్నికల్ టీమ్ వివరాలను త్వరలోనే అధికారికంగా ప్రకటించనున్నారని సమాచారం.
మొత్తానికి రూ.150 కోట్ల బడ్జెట్.. పాన్ ఇండియా రిలీజ్.. భారీ విజువల్స్.. అందులోనూ తొలిసారి కర్ణుడి పాత్రలో లారెన్స్.. ఇవన్నీ కలిపి ‘మహావీర్ కర్ణ’పై ఆసక్తిని పెంచుతున్నాయి.
ఇక ఈ మధ్య పౌరాణిక, ఇతిహాస నేపథ్య కథలను ఆధునిక టెక్నాలజీతో గ్రాండ్గా చూపించే ట్రెండ్కు ‘బాహుబలి’ తర్వాత మరింత ఊపు వచ్చింది. ఆ తర్వాత ‘కల్కి 2898 ఏడీ’, ‘కార్తికేయ 2’ వంటి సినిమాలు కూడా ఈ తరహా కథలకు మంచి స్పందన తీసుకొచ్చాయి. అదే సమయంలో ‘ఆదిపురుష్’ విషయంలో ప్రేక్షకుల నుంచి మిశ్రమ స్పందన వచ్చిన విషయం కూడా తెలిసిందే.
మరి కర్ణుడిగా రాఘవ లారెన్స్ వెండితెరపై ఎలాంటి మ్యాజిక్ చేయబోతున్నారో చూడాలి!
