పంజాబ్లోని గురుదాస్పూర్లో భారత్-పాకిస్థాన్ సరిహద్దు వెంబడి ఇద్దరు భారత పోలీసుల హత్య వెనుక పాకిస్థాన్ గూఢచారి సంస్థ ఐఎస్ఐ (ISI) హస్తం ఉన్నట్లు అధికారులు నిర్ధారించారు. సరిహద్దుకు కేవలం 2 కిలోమీటర్ల దూరంలో ఉన్న దోరంగ్లా పోలీస్ ఔట్పోస్ట్ వద్ద విధుల్లో ఉన్న ఏఎస్ఐ గుర్నామ్ సింగ్, హోంగార్డు అశోక్ కుమార్లను కిరాయి హంతకులు కాల్చి చంపారు. కేవలం రూ. 20 వేల కోసం స్థానిక యువకులతో ఐఎస్ఐ ఈ దారుణానికి ఒడిగట్టినట్లు డీఐజీ సందీప్ గోయల్ వెల్లడించారు.
ఈ కేసులో నిందితులు ముగ్గురు స్థానిక గ్రామాలకే చెందిన రంజిత్ సింగ్, ఇంద్రజీత్ సింగ్, దిలావర్ సింగ్ అని పోలీసులు గుర్తించారు. వీరు పోలీసుల కదలికలపై ముందుగానే రెక్కీ నిర్వహించి ఆదివారం అర్థరాత్రి కాల్పులు జరిపారు. ఈ ఘటన తర్వాత పాకిస్థాన్ గ్యాంగ్స్టర్ షెహజాద్ భట్టి సోషల్ మీడియాలో ఒక వీడియో షేర్ చేయగా, ‘తెహ్రీక్-ఇ-తాలిబన్ హిందూస్థాన్’ అనే ఉగ్రవాద సంస్థ ఈ హత్యలను క్లెయిమ్ చేసుకోవడం గమనార్హం. కాగా, నిందితుల్లో ఒకర్ని పోలీసులు ఎన్కౌంటర్ చేయగా, మరొకరిని అరెస్ట్ చేశారు. పరారీలో ఉన్న మూడో వ్యక్తి కోసం గాలింపు కొనసాగుతోంది.
పంజాబ్ సరిహద్దుల్లో ఇటీవల కాలంలో పాక్ ప్రేరేపిత దుశ్చర్యలు పెరిగిపోతున్నాయి. దోరంగ్లా సెక్టార్లో డ్రోన్ల ద్వారా డ్రగ్స్, ఆయుధాలు మరియు పేలుడు పదార్థాలను సరిహద్దులు దాటించేందుకు ఐఎస్ఐ నిరంతరం ప్రయత్నిస్తోంది. గత ఏడాది ఇక్కడ జరిగిన ఐఈడీ పేలుడులో ఒక బీఎస్ఎఫ్ జవాను గాయపడిన ఘటనను అధికారులు గుర్తు చేస్తున్నారు. సరిహద్దు వెంబడి నిఘా విధుల్లో ఉన్న పోలీసులనే టార్గెట్ చేయడం ద్వారా స్థానికంగా భయాందోళనలు సృష్టించి, స్మగ్లింగ్ కార్యకలాపాలను సులభతరం చేసుకోవడమే ఐఎస్ఐ అసలు పన్నాగమని నిఘా వర్గాలు విశ్లేషిస్తున్నాయి.
