సంచలన దర్శకుడు రామ్ గోపాల్ వర్మ (RGV) చిత్ర పరిశ్రమ భవిష్యత్తుపై మరోసారి విస్ఫోటనం లాంటి వ్యాఖ్యలు చేశారు. ‘సీడెన్స్ 2.0’ (Seedence 2.0) వంటి అధునాతన ఏఐ (AI) టూల్స్ రాకతో ప్రస్తుత సినిమా ఎకోసిస్టమ్ పూర్తిగా అంతరించిపోతుందని ఆయన జోస్యం చెప్పారు. వందల కోట్ల బడ్జెట్లు, వేల మంది టెక్నీషియన్లతో నడిచే పాత కాలపు చిత్ర పరిశ్రమ ఒక భారీ ‘బ్రూటల్ మర్డర్’కు సాక్ష్యం కాబోతోందని, ఇది పరిశ్రమకు మరణ శాసనమని వర్మ అభిప్రాయపడ్డారు.
ప్రస్తుతం రాజమౌళి వంటి దర్శకులు తమ అద్భుతమైన ఊహాశక్తితో వేల కోట్లు రాబట్టగలుగుతున్నారని, అయితే ఏఐ వల్ల సామాన్యుడికి కూడా అలాంటి శక్తి లభిస్తుందని వర్మ విశ్లేషించారు. 120 కోట్ల జనాభా ఉన్న మన దేశంలో పల్లెల్లో సైతం అద్భుతమైన టాలెంట్ ఉన్నవారు ఉన్నారని, పెట్టుబడి లేక వెనుకబడ్డ వారికి ఏఐ ఒక గొప్ప వరమని పేర్కొన్నారు. కేవలం ఒక డిస్క్రిప్టివ్ ప్రాంప్ట్ ఇస్తే చాలు… నటీనటుల డేట్స్ లేదా మూడ్స్తో సంబంధం లేకుండా నిమిషాల్లో సినిమాటిక్ విజువల్స్ తయారవుతాయని ఆయన వివరించారు.
గత వందేళ్లుగా సినిమా పరిశ్రమ డైనోసార్లలా ఏకఛత్రాధిపత్యం చేసిందని, ఇప్పుడు ఏఐ అనే ఉల్క (Asteroid) భూమిని తాకి వాటిని అంతం చేయబోతోందని వర్మ పోల్చారు. అయితే దీనిని ఆయన ప్రతికూలంగా చూడటం లేదు; ఇది సినిమా ప్రపంచంలో ‘అల్టిమేట్ ప్రజాస్వామ్యం’ అని, ముంబై వెళ్లకుండానే ఇంట్లో కూర్చుని ఎవరైనా సినిమాలు తీయొచ్చని పేర్కొన్నారు. టాలెంట్ మాత్రమే కీలకమయ్యే ఈ కొత్త శకం సినీ వర్గాల్లో ఇప్పుడు పెను చర్చకు దారితీసింది.
