మహిళల ప్రాణాలను హరించే గర్భాశయ ముఖద్వార కేన్సర్ను (Cervical Cancer) దేశం నుండి తరిమికొట్టేందుకు కేంద్ర ప్రభుత్వం ఒక చరిత్రాత్మక నిర్ణయం తీసుకుంది. జాతీయ వ్యాక్సినేషన్ కార్యక్రమంలో భాగంగా 14 ఏళ్లు దాటిన బాలికలందరికీ హ్యుమన్ పాపిలోమా వైరస్ (HPV) టీకాను ఉచితంగా అందించాలని నిర్ణయించింది. ప్రపంచ ఆరోగ్య సంస్థ (WHO) నిర్దేశించిన లక్ష్యం ప్రకారం 2030 నాటికి ఈ కేన్సర్ను పూర్తిగా నిర్మూలించాలనే ఉద్దేశంతో ఈ భారీ కార్యక్రమాన్ని ప్రారంభించబోతోంది. ప్రభుత్వ ఆరోగ్య కేంద్రాల్లో గార్డాసిల్ (Gardasil) అనే ఇంజెక్షన్ను ఉచితంగా పంపిణీ చేయనున్నారు.
ఈ హెచ్పీవీ టీకా కేవలం ఒక డోసుతోనే బాలికలకు దీర్ఘకాలిక రక్షణ కల్పిస్తుందని శాస్త్రీయ పరిశోధనలు వెల్లడిస్తున్నాయి. ముఖ్యంగా కేన్సర్కు ప్రధాన కారణమయ్యే హెచ్పీవీ టైప్ 16, 18 తో పాటు 6, 11 రకాల వైరస్ల నుండి ఈ వ్యాక్సిన్ రక్షణ ఇస్తుంది. చైనా, అమెరికా తర్వాత ప్రపంచంలోనే అత్యధిక గర్భాశయ కేన్సర్ బాధితులు భారత్లో ఉండటం ఆందోళన కలిగించే విషయం. ఈ నేపథ్యంలో చిన్న వయసులోనే టీకా తీసుకోవడం ద్వారా భవిష్యత్తులో కేన్సర్ వచ్చే అవకాశాలను దాదాపు 90% వరకు తగ్గించవచ్చు.
ఇప్పటికే తమిళనాడు రాష్ట్రం 14 ఏళ్లలోపు బాలికలకు ఉచితంగా ఈ టీకాను అందించి దేశంలోనే మొదటి స్థానంలో నిలవగా, ఇప్పుడు కేంద్రం దీనిని దేశవ్యాప్తం చేస్తోంది. కేన్సర్ ముప్పు పొంచి ఉన్న మహిళలు 30 ఏళ్లలోపు ఈ టీకా తీసుకుంటే, జీవితకాలంలో కేవలం రెండు లేదా మూడు సార్లు స్క్రీనింగ్ పరీక్షలు చేయించుకుంటే సరిపోతుందని నిపుణులు చెబుతున్నారు. ఈ ఉచిత వ్యాక్సినేషన్ ప్రక్రియ ద్వారా ఏటా వేలాది మంది మహిళల ప్రాణాలను కాపాడటమే కాకుండా, రాబోయే తరాలకు ఆరోగ్యకరమైన భవిష్యత్తును అందించవచ్చని ప్రభుత్వం భావిస్తోంది.
