నటుడు సుహాస్ హీరోగా గోపి అచ్చర దర్శకత్వంలో తెరకెక్కిన కామెడీ ఎంటర్టైనర్ ‘హే భగవాన్’. ఈ చిత్ర ట్రైలర్ లాంచ్ వేడుకలో సీనియర్ నటుడు నరేష్ తనదైన శైలిలో సరదా వ్యాఖ్యలు చేసి అందరినీ నవ్వించారు. వాలంటైన్స్ వీక్లో భాగంగా వేడుక జరిగిన రోజు ‘హగ్ డే’ కావడంతో, నరేష్ వేదికపై ఉన్న పురుషులందరినీ ఆత్మీయంగా ఆలింగనం చేసుకున్నారు. అయితే హీరోయిన్ మరియు యాంకర్ దగ్గరకు వచ్చేసరికి ఆయన చేసిన కామెంట్స్ ఇప్పుడు సోషల్ మీడియాలో వైరల్ అవుతున్నాయి.
వేదికపై ఉన్న హీరోయిన్ శివాని, యాంకర్ స్రవంతి వద్దకు వెళ్లిన నరేష్.. “మిమ్మల్ని కూడా హగ్ చేసుకోవాలని అనుకున్నాను, కానీ మీరు చాలా లక్షణంగా చీరలు కట్టుకుని వచ్చారు. ఇటీవల జరిగిన కొన్ని పరిణామాల వల్ల సినిమా వేడుకలకు చాలామంది మహిళలు చీరలు ధరించి వస్తున్నారు” అని వ్యాఖ్యానించారు. భారతీయ సంస్కృతి ప్రకారం మగవాళ్లు ఆడవాళ్లను హగ్ చేసుకోకూడదని, అందుకే మీరిద్దరే ఒకరినొకరు హగ్ చేసుకోండి అంటూ ఆయన చమత్కరించారు.
నరేష్ చేసిన ఈ వ్యాఖ్యలు గతంలో నటుడు శివాజీ ఒక సినిమా ఫంక్షన్లో హీరోయిన్ల డ్రెస్సింగ్పై చేసిన వివాదాస్పద వ్యాఖ్యలను ఉద్దేశించి చేసినట్లుగా నెటిజన్లు భావిస్తున్నారు. ఏది ఏమైనా, హగ్ డే నాడు నరేష్ చేసిన ఈ సరదా హంగామా వేడుకలో ప్రత్యేక ఆకర్షణగా నిలిచింది. ‘హే భగవాన్’ చిత్రంలో యాంకర్ స్రవంతి ఒక కీలక పాత్రలో నటిస్తుండగా, ఫిబ్రవరి 20న ఈ సినిమా థియేటర్లలో విడుదల కానుంది.
