నేచరల్ స్టార్ నాని మరియు ‘దసరా’ దర్శకుడు శ్రీకాంత్ ఓదెల కాంబినేషన్లో వస్తున్న మోస్ట్ అవేటెడ్ గ్యాంగ్స్టర్ డ్రామా ‘ది ప్యారడైజ్’. ఈ సినిమాలో నాని ‘జడల్’ అనే వైవిధ్యమైన పాత్రలో కనిపిస్తుండగా, ఇప్పటికే విడుదలైన గ్లింప్స్ సినిమాపై భారీ అంచనాలను పెంచేసింది. ప్రస్తుతం ఈ మూవీ షూటింగ్ హైదరాబాద్లో శరవేగంగా జరుగుతోంది. తాజాగా అందుతున్న సమాచారం ప్రకారం, ఈ చిత్రంలో నాని ఇంట్రడక్షన్ సాంగ్ను అత్యంత ప్రతిష్టాత్మకంగా ప్లాన్ చేస్తున్నారు మేకర్స్.
ఈ ఇంట్రడక్షన్ సాంగ్ కోసం హైదరాబాద్లో ఒక భారీ సెట్ను నిర్మించారు. వందలాది మంది డ్యాన్సర్లతో అత్యంత భారీ స్థాయిలో ఈ పాట చిత్రీకరణ ప్రారంభమైంది. రాక్ స్టార్ అనిరుద్ రవిచందర్ ఈ పాట కోసం అదిరిపోయే ‘మాస్ బ్యాంగర్’ ట్యూన్ను అందించగా, ఇది సినిమాకే మేజర్ హైలెట్గా నిలుస్తుందని చిత్ర బృందం నమ్ముతోంది. నాని ఎనర్జీకి తగ్గట్లుగా అనిరుద్ మ్యూజిక్ మరియు విజువల్స్ అద్భుతంగా ఉండబోతున్నాయని సమాచారం.
ఈ క్రేజీ సాంగ్కు ప్రముఖ కొరియోగ్రాఫర్ సుధన్ మాస్టర్ డైనమిక్ స్టెప్పులను కంపోజ్ చేస్తున్నారు. విజయ్ నటించిన ‘జన నాయగన్’ వంటి సినిమాలకు పనిచేసిన ఆయన, నాని కోసం మునుపెన్నడూ చూడని హై-ఎనర్జీ యాక్షన్ మూమెంట్స్ను సిద్ధం చేశారు. ‘జడల్’ లుక్లో నాని వేసే మాస్ స్టెప్పులు థియేటర్లలో ఈలలు వేయించడం ఖాయమని తెలుస్తోంది. దసరా తర్వాత వస్తున్న ఈ కాంబో బాక్సాఫీస్ వద్ద మరోసారి మ్యాజిక్ చేయడానికి సిద్ధమవుతోంది.
