ఒకప్పుడు వెండితెరపై హిట్ పెయిర్గా పేరు తెచ్చుకున్న శివాజీ, లయ ప్రధాన పాత్రల్లో నటించిన తాజా చిత్రం ‘సాంప్రదాయనీ సుప్పినీ సుద్ధపూసనీ’. సుధీర్ శ్రీరామ్ దర్శకత్వంలో క్రైమ్ కామెడీ థ్రిల్లర్గా రూపొందిన ఈ మూవీ ట్రైలర్ను మేకర్స్ తాజాగా విడుదల చేశారు. ఈ చిత్రంలో శివాజీ నిజాయితీ గల పంచాయతీ సెక్రటరీ శ్రీరామ్గా కనిపిస్తుండగా, ఆయన భార్యగా లయ నటించారు. దర్శకుడు అనిల్ రావిపూడి వాయిస్ ఓవర్తో మొదలైన ఈ ట్రైలర్ సినిమాపై ఆసక్తిని పెంచుతోంది.
ట్రైలర్ విషయానికి వస్తే, ఒక మధ్యతరగతి కుటుంబంలో జరిగే సరదా సంఘటనలతో ప్రారంభమై, అకస్మాత్తుగా ఒక హత్య కేసు చుట్టూ తిరిగే థ్రిల్లింగ్ ఎలిమెంట్స్తో సాగింది. “ఓ ఫ్యామిలీ ఇంత భయంకరంగా ఉంటుందని మిమ్మల్ని చూశాకే తెలిసింది” అని అలీ చెప్పే డైలాగ్ ఈ చిత్రంలో ఉన్న క్రైమ్ యాంగిల్ను హింట్ ఇస్తోంది. నిజాయితీ పరుడైన శ్రీరామ్ కుటుంబం అసలు క్రిమినల్స్గా ఎందుకు మారాల్సి వచ్చింది? ఆ హత్య కేసు నుండి వారు ఎలా బయటపడ్డారు? అనే అంశాలను వినోదాత్మకంగా చూపించబోతున్నారు.
ఈ సినిమా థియేటర్లలో కాకుండా నేరుగా ఓటీటీలోనే సందడి చేయనుంది. శివాజీ స్వయంగా నిర్మించిన ఈ చిత్రం ఫిబ్రవరి 12వ తేదీ నుంచి ‘ఈటీవీ విన్’ (ETV Win) ప్లాట్ఫామ్లో స్ట్రీమింగ్ కానుంది. ఇందులో అలీ, రఘుబాబు, పృథ్వీరాజ్, ధన్రాజ్ వంటి భారీ తారాగణం నటిస్తున్నారు. పాత తరం కాంబినేషన్ సరికొత్త కథతో వస్తుండటంతో మెగా అభిమానులు మరియు సినీ ప్రియులు ఈ సినిమా కోసం ఆసక్తిగా ఎదురుచూస్తున్నారు.
