టాలీవుడ్లో వరుస విజయాలతో ‘హిట్ మెషిన్’గా గుర్తింపు పొందిన స్టార్ డైరెక్టర్ అనిల్ రావిపూడి ప్రస్తుతం అరుదైన రికార్డులతో దూసుకుపోతున్నారు. 2025 సంక్రాంతికి ‘సంక్రాంతికి వస్తున్నాం’ చిత్రంతో ఘనవిజయం సాధించిన ఆయన, 2026 సంక్రాంతికి మెగాస్టార్ చిరంజీవితో తెరకెక్కించిన ‘మన శంకర్ వరప్రసాద్ గారు’ సినిమాతో మరో బ్లాక్బస్టర్ను తన ఖాతాలో వేసుకున్నారు. వరుసగా రెండు ఏళ్ళపాటు సంక్రాంతి సీజన్లలో రూ. 300 కోట్ల క్లబ్ సినిమాలను అందించిన ఏకైక దర్శకుడిగా ఆయన సరికొత్త చరిత్ర సృష్టించారు.
ప్రస్తుతం విక్టరీ వెంకటేష్తో తన తదుపరి ప్రాజెక్ట్ కోసం స్క్రిప్ట్ పనుల్లో బిజీగా ఉన్న అనిల్ రావిపూడి, తాజాగా ఒక ఇంటర్వ్యూలో తన నటనా అభిలాష గురించి ఆసక్తికర వ్యాఖ్యలు చేశారు. సాధారణంగా దర్శకులు హీరోలుగా మారడం చూస్తుంటాం, కానీ అనిల్ రావిపూడి మాత్రం తనకు హీరోగా నటించడం కంటే నెగెటివ్ షేడ్స్ ఉన్న ‘విలన్’ పాత్రలు చేయడమే ఇష్టమని వెల్లడించారు. తనదైన కామెడీ టైమింగ్తో ప్రేక్షకులను నవ్వించే ఈ దర్శకుడిలో ఇటువంటి విలనీ కోణం ఉందన్న విషయం తెలిసి అభిమానులు ఆశ్చర్యపోతున్నారు.
తనకు లెజెండరీ నటుడు రఘువరన్ అంటే ఎంతో ఇష్టమని, ఆయనలాంటి పవర్ఫుల్ విలన్ పాత్రలు చేయాలని తన కోరిక అని అనిల్ పేర్కొన్నారు. అయితే ప్రస్తుతానికి తన పూర్తి దృష్టి కేవలం దర్శకత్వంపైనే ఉందని, యాక్టింగ్ గురించి ఇప్పుడే ఎలాంటి ప్రణాళికలు లేవని ఆయన స్పష్టం చేశారు. వెంకటేష్తో రాబోయే కొత్త సినిమాలో పూజా హెగ్డే హీరోయిన్గా నటించే అవకాశం ఉన్నట్లు సినీ వర్గాల్లో గట్టిగా ప్రచారం జరుగుతోంది.
