బుల్లితెర నటుడు ప్రభాకర్ తనయుడు, ‘యాటిట్యూడ్ స్టార్’గా పిలవబడే చంద్రహాస్కు కష్టాలు మొదలయ్యాయి. ఆయన హీరోగా నటిస్తున్న ‘బరాబర్ ప్రేమిస్తా’ సినిమా ప్రీ-రిలీజ్ ఈవెంట్లో పాడిన ‘గుంజి గుంజి’ అనే పాట ఇప్పుడు పెద్ద వివాదానికి దారితీసింది. ఈ పాటలో వాడిన అసభ్యకర పదజాలంపై విమర్శలు వెల్లువెత్తుతుండగా, తాజాగా జూబ్లీహిల్స్ పోలీస్ స్టేషన్లో ఒక కానిస్టేబుల్ ఫిర్యాదు మేరకు చంద్రహాస్పై కేసు నమోదైంది. పబ్లిక్ ఈవెంట్లో అభ్యంతరకర భాష వాడటం సరికాదని ఫిర్యాదులో పేర్కొన్నారు.
అసలు వివాదం ఏమిటంటే, ప్రమోషన్స్ కోసం చంద్రహాస్ సినిమాలో లేని బూతు పదాలను కలిపి ఈ పాటను పాడటం సోషల్ మీడియాలో విపరీతమైన ట్రోలింగ్కు కారణమైంది. దీనిపై ఒక సీనియర్ జర్నలిస్ట్ స్పందించగా, చంద్రహాస్ అతనికి 24 గంటల సమయం ఇచ్చి వార్నింగ్ ఇవ్వడం పరిస్థితిని మరింత తీవ్రం చేసింది. తనపై అసభ్యకరమైన వీడియోలు చేస్తున్నారని, క్షమాపణ చెప్పకపోతే తీవ్ర పరిణామాలు ఉంటాయని హెచ్చరించడంతో, ఆ జర్నలిస్ట్ ప్రాణహాని ఉందని మాదాపూర్ పోలీసులను ఆశ్రయించారు. దీంతో అక్కడ కూడా ఆయనపై కేసు నమోదైంది.
సినిమా ప్రమోషన్స్ కోసం ఇలాంటి మార్గాలను ఎంచుకోవడంపై సినీ విశ్లేషకులు మరియు సహ నటులు పెదవి విరుస్తున్నారు. ఈవెంట్లో పాల్గొన్న జేడీ చక్రవర్తి సైతం, ఆ పాట పాడుతున్నప్పుడు అక్కడి నుంచి వెళ్ళిపోవాలనిపించిందని అసహనం వ్యక్తం చేశారు. ఇంత వివాదం జరుగుతున్నా చంద్రహాస్ మాత్రం తాను క్షమాపణ చెప్పనని భీష్మించుకుని కూర్చోవడం చర్చనీయాంశంగా మారింది. ఆయన వెనక్కి తగ్గి సారీ చెబితేనే ఈ వివాదానికి తెరపడే అవకాశం ఉందని ఇండస్ట్రీ వర్గాలు అభిప్రాయపడుతున్నాయి.
