తెలుగు చిత్రసీమలో అగ్ర నిర్మాతలుగా కొనసాగుతున్న ‘దిల్’ రాజు, నాగవంశీల మధ్య వ్యాపార బంధం తెగిందా అనే చర్చ ఫిలిం నగర్ వర్గాల్లో వేడెక్కింది. సాధారణంగా నాగవంశీ నిర్మించే సినిమాలకు నైజాం (తెలంగాణ) ప్రాంతంలో దిల్ రాజు ప్రధాన డిస్ట్రిబ్యూటర్. అయితే, తాజాగా విశ్వక్ సేన్ నటించిన ‘ఫంకీ’ సినిమా పంపిణీ హక్కుల విషయంలో చోటుచేసుకున్న పరిణామాలు వీరిద్దరి మధ్య దూరం పెరిగిందనే వార్తలకు బలం చేకూరుస్తున్నాయి.
విశ్వసనీయ సమాచారం ప్రకారం, ‘ఫంకీ’ నైజాం డిస్ట్రిబ్యూషన్ హక్కులను నాగవంశీ ఈసారి దిల్ రాజుకు కాకుండా అక్కినేని కుటుంబానికి చెందిన అన్నపూర్ణ డిస్ట్రిబ్యూషన్ సంస్థకు అప్పగించినట్లు తెలుస్తోంది. సుప్రియ నేతృత్వంలో నడుస్తున్న ఈ సంస్థ ద్వారా సినిమాను విడుదల చేయాలని నిర్ణయించడం ఇండస్ట్రీలో హాట్ టాపిక్ అయింది. గతంలో వీరిద్దరి మధ్య ఉన్న సాన్నిహిత్యం దృష్ట్యా, ఈ మార్పు దిల్ రాజుకు పెద్ద షాక్ అని చెప్పవచ్చు.
కేవలం ‘ఫంకీ’ సినిమాకే పరిమితం కాకుండా, భవిష్యత్తులో దిల్ రాజు, సురేష్ బాబు వంటి దిగ్గజ డిస్ట్రిబ్యూటర్లకు పోటీగా నాగవంశీ మరికొందరు నిర్మాతలతో కలిసి ఒక కొత్త డిస్ట్రిబ్యూషన్ వ్యవస్థను బలోపేతం చేస్తున్నట్లు సమాచారం. సాహు గారపాటి, బాపినీడు వంటి నిర్మాతలు ఈ కొత్త కూటమిలో భాగంగా ఉన్నారని, అందుకే దిల్ రాజుకు హ్యాండ్ ఇచ్చి తమ సొంత నెట్వర్క్ను యాక్టివ్ చేస్తున్నారని టాక్ వినిపిస్తోంది.
