ప్రభాస్ హీరోగా వచ్చిన ‘ది రాజాసాబ్’ చిత్రం మొదటి రోజే ప్రపంచవ్యాప్తంగా రూ. 112 కోట్ల వసూళ్లు సాధించి బాక్సాఫీస్ వద్ద రికార్డు సృష్టించింది. ఈ సందర్భంగా నిర్వహించిన సక్సెస్ మీట్లో దర్శకుడు మారుతి మాట్లాడుతూ, సినిమా ఫలితాన్ని కేవలం ఒక్క రోజులోనే డిసైడ్ చేయవద్దని కోరారు. ఇది ఒక కొత్త తరహా ‘మైండ్ గేమ్’ కాన్సెప్ట్ అని, ఇలాంటి ప్రయోగాత్మక చిత్రాలు ప్రేక్షకులకు పూర్తిగా చేరువ కావడానికి కొంత సమయం పడుతుందని ఆయన అభిప్రాయపడ్డారు.
ఈ చిత్రానికి వస్తున్న మిశ్రమ స్పందనపై స్పందిస్తూ, హైదరాబాద్లో షోలు సరైన సమయానికి పడకపోవడం వల్ల ప్రేక్షకులు ఇబ్బంది పడ్డారని మారుతి క్షమాపణలు చెప్పారు. ముఖ్యంగా అర్ధరాత్రి సమయంలో మైండ్ గేమ్తో కూడిన సినిమాను చూడటం ప్రేక్షకులకు కాస్త కష్టమై ఉండవచ్చని ఆయన అంగీకరించారు. అయితే, సినిమాను చూసిన ఐకాన్ స్టార్ అల్లు అర్జున్ స్వయంగా ఫోన్ చేసి అభినందించారని, అలాగే పరిశ్రమలోని పలువురు దర్శకులు కూడా సినిమాలోని కొత్త పాయింట్ను మెచ్చుకున్నారని మారుతి వెల్లడించారు.
ముఖ్యంగా ప్రభాస్ అభిమానులు నిరాశ చెందిన ‘ఓల్డ్ గెటప్’ సన్నివేశాలపై మారుతి కీలక నిర్ణయం తీసుకున్నారు. సాంకేతిక కారణాల వల్ల తొలగించిన ఆ 8 నిమిషాల సన్నివేశాలను శనివారం సాయంత్రం షోల నుంచే థియేటర్లలో జోడిస్తున్నట్లు ప్రకటించారు. సెకండ్ హాఫ్లో మార్పులు చేసి ఈ సీన్లను యాడ్ చేశామని, ప్రభాస్ను అభిమానులు ఎలా చూడాలనుకుంటున్నారో అలాగే ఈ సీన్లు ఉంటాయని ఆయన హామీ ఇచ్చారు. సంక్రాంతి సీజన్ ముగిసేలోపు ‘రాజాసాబ్’ బాక్సాఫీస్ వద్ద మరింత బలమైన వసూళ్లు రాబడుతుందని చిత్ర బృందం ధీమా వ్యక్తం చేసింది.
