పాన్ ఇండియా స్టార్ ప్రభాస్ నటించిన ‘ది రాజా సాబ్’ చిత్రంపై వస్తున్న విమర్శలకు దర్శకుడు మారుతి చెక్ పెట్టారు. టీజర్, ట్రైలర్లలో చూపించిన ప్రభాస్ ‘ఓల్డ్ గెటప్’ సీన్లు థియేటర్లో కనిపించకపోవడంతో అభిమానులు తీవ్ర అసంతృప్తి వ్యక్తం చేసిన సంగతి తెలిసిందే. దీనిపై స్పందించిన మారుతి, సాంకేతిక కారణాల వల్ల మొదట ఆ సీన్లను చేర్చలేకపోయామని, అయితే ఫ్యాన్స్ ఆవేదనను గుర్తించి ఇప్పుడు ఆ 8 నిమిషాల కీలక సన్నివేశాలను సినిమాకు జోడించినట్లు ప్రకటించారు.
తాజాగా నిర్వహించిన సక్సెస్ మీట్లో మారుతి మాట్లాడుతూ, శనివారం సాయంత్రం 6 గంటల షో నుంచే ఈ కొత్త సీన్లు థియేటర్లలో అందుబాటులోకి వచ్చాయని తెలిపారు. సెకండ్ హాఫ్లో కొన్ని సాగతీత సీన్లను తొలగించి, ఆ స్థానంలో ప్రేక్షకులు ఎంతో ఆసక్తిగా ఎదురుచూస్తున్న ప్రభాస్ ఓల్డ్ లుక్ సన్నివేశాలను చేర్చామని చెప్పారు. దీనికి సంబంధించిన సెన్సార్ ప్రక్రియ కూడా పూర్తయిందని, ప్రభాస్ పడ్డ కష్టం వృధా కాకూడదనే ఈ నిర్ణయం తీసుకున్నామని వెల్లడించారు.
సినిమా ఫలితంపై వస్తున్న మిశ్రమ స్పందనపై కూడా మారుతి స్పందించారు. ‘ది రాజా సాబ్’ ఒక కొత్త పాయింట్తో తీసిన చిత్రమని, దీని అసలు బలం అర్థం కావడానికి కనీసం పది రోజులు పడుతుందని ఆయన అభిప్రాయపడ్డారు. క్లైమాక్స్ 40 నిమిషాలు ప్రేక్షకులకు బాగా నచ్చుతోందని, సోమవారం నుంచి టికెట్ ధరలు కూడా సాధారణ స్థితికి వస్తాయని ఆయన పేర్కొన్నారు. ఈ సమావేశంలో హీరోయిన్లు నిధి అగర్వాల్, రిద్ధి కుమార్ మరియు నిర్మాత విశ్వప్రసాద్ పాల్గొని తమ సంతోషాన్ని పంచుకున్నారు.
