పవర్ స్టార్ పవన్ కల్యాణ్ తన సొంత నిర్మాణ సంస్థ ‘పవన్ కల్యాణ్ క్రియేటివ్ వర్క్స్’ ద్వారా ఒక ఆసక్తికరమైన వీడియోను విడుదల చేసి అభిమానుల్లో ఒక్కసారిగా ఉత్కంఠను రేపారు. జపనీస్ మార్షల్ ఆర్ట్స్ థీమ్తో సాగే ఈ వీడియోలో ఎర్రటి సూర్యుడు, పవర్ఫుల్ బ్యాక్గ్రౌండ్ స్కోర్తో పాటు పవన్ కల్యాణ్ మార్షల్ ఆర్ట్స్ కిక్ ఇస్తున్న దృశ్యాలు చూపించారు. సుమారు రెండు దశాబ్దాల క్రితం ‘తమ్ముడు’, ‘బద్రి’ సినిమాల్లో తన మార్షల్ ఆర్ట్స్ విన్యాసాలతో మెప్పించిన పవన్, మళ్లీ ఇన్నాళ్లకు అదే తరహా గెటప్లో కనిపించడంతో ఫ్యాన్స్ ఆనందానికి అవధులు లేకుండా పోయాయి.
ఈ వీడియో వెనుక ఉన్న అసలు ఉద్దేశ్యం ఏమిటన్న దానిపై ప్రస్తుతం సినీ వర్గాల్లో పెద్ద ఎత్తున చర్చ నడుస్తోంది. ఇది ఆయన నటించబోయే కొత్త సినిమాకు సంబంధించిన టీజరా? లేక తన ప్రొడక్షన్ హౌస్ను సరికొత్తగా రీ-లాంచ్ చేస్తున్నారా? అన్న దానిపై స్పష్టత రావాల్సి ఉంది. వీడియోలో ‘PK’ లోగో ఉన్న టీ-షర్ట్ ధరించి, చేతిలో కటానా కత్తితో పవన్ కనిపించిన తీరు చూస్తుంటే.. ఇది ఒక భారీ మార్షల్ ఆర్ట్స్ ప్రాజెక్ట్ అయ్యే అవకాశం ఉందని నెటిజన్లు అంచనా వేస్తున్నారు.
ప్రస్తుతం ఆంధ్రప్రదేశ్ ఉప ముఖ్యమంత్రిగా రాజకీయాల్లో బిజీగా ఉన్నప్పటికీ, పవన్ కల్యాణ్ తన సినిమా ప్రాజెక్టులను ఏమాత్రం నిర్లక్ష్యం చేయడం లేదు. ఇప్పటికే ‘ఉస్తాద్ భగత్ సింగ్’ వేసవి విడుదలకు సిద్ధమవుతుండగా, సురేందర్ రెడ్డి దర్శకత్వంలో మరో సినిమా పట్టాలెక్కనుంది. ఈ క్రమంలో ఈ కొత్త వీడియో ఒక వెబ్ సిరీస్ కోసమా లేక మరేదైనా వినూత్న ప్రయత్నమా అన్న ఉత్కంఠకు తెరపడాలంటే అధికారిక ప్రకటన వచ్చే వరకు వేచి చూడాల్సిందే.
