2001లో విడుదలైన ఈ సినిమా అప్పట్లో సృష్టించిన ప్రభంజనం అంతా ఇంతా కాదు. ఈ సినిమా గురించి త్రివిక్రమ్ మాట్లాడుతూ ఒక ఆసక్తికరమైన విషయాన్ని పంచుకున్నారు. సినిమా విడుదలకు ముందు రామానాయుడు గారి కుటుంబ సభ్యుల కోసం ప్రత్యేక ప్రదర్శన వేశామని, అప్పుడు సినిమా చూసిన వెంకటేశ్ భార్య నీరజ గారు చెప్పిన మాటలు అక్షర సత్యాలయ్యాయని ఆయన అన్నారు. “మనసు బాలేనప్పుడు మనం ఎలాగైతే ‘గుండమ్మ కథ’ చూస్తామో, రాబోయే తరాల వారు ఈ సినిమాను అలాగే మళ్ళీ మళ్ళీ చూస్తారు” అని ఆమె ఆరోజే చెప్పారని, నేడు అదే జరుగుతోందని త్రివిక్రమ్ సంతోషం వ్యక్తం చేశారు.
ఈ చిత్రానికి సిరివెన్నెల సీతారామశాస్త్రి గారు అందించిన సాహిత్యం మరో ప్రధాన బలం. సిరివెన్నెల గారితో గడిపిన రోజులను గుర్తు చేసుకుంటూ, ఆయన కేవలం డబ్బు కోసం కాకుండా కథా సందర్భానికి తగ్గట్టుగా ప్రాణం పోసి పాటలు రాసేవారని త్రివిక్రమ్ కొనియాడారు. “ఒక సందర్భంలో పాట సెట్ కాదనిపిస్తే ఆయన ముఖం మీదే చెప్పేసేవారు, అందుకే ఆ పాటలు నేటికీ శ్రోతల గుండెల్లో నిలిచిపోయాయి” అని పేర్కొన్నారు. విజయ్ భాస్కర్ దర్శకత్వం వహించిన ఈ సినిమా ద్వారానే ఆర్తి అగర్వాల్ టాలీవుడ్ కు పరిచయమై స్టార్ హీరోయిన్ గా ఎదిగారు.
ప్రస్తుతం టాలీవుడ్లో రీ-రిలీజ్ ట్రెండ్ నడుస్తున్న నేపథ్యంలో, ఫ్యామిలీ ఆడియన్స్ అందరూ కలిసి చూడదగ్గ ‘నువ్వు నాకు నచ్చావ్’ మళ్లీ థియేటర్లలోకి వస్తుండటం పట్ల ప్రేక్షకులు ఎంతో ఉత్సాహంగా ఉన్నారు. వెంకటేశ్ కెరీర్లో వన్ ఆఫ్ ది బెస్ట్ మూవీగా నిలిచిన ఈ సినిమా, మళ్లీ థియేటర్లలో నవ్వుల పువ్వులు పూయించడం ఖాయమని చిత్ర యూనిట్ ధీమా వ్యక్తం చేస్తోంది. సరికొత్త సాంకేతికతతో 4K వెర్షన్లో ఈ సినిమాను ప్రేక్షకుల ముందుకు తీసుకువస్తున్నారు.
