హీరోయిన్ల డ్రెస్సింగ్పై తాను చేసిన వ్యాఖ్యలకు సంబంధించి మహిళా కమిషన్ ఇచ్చిన నోటీసులపై శివాజీ శనివారం విచారణకు హాజరయ్యారు. అనంతరం మీడియాతో మాట్లాడుతూ, సినిమా ఇండస్ట్రీలోనే తనపై ఒక వర్గం కుట్ర చేస్తోందని ఆయన ఆరోపించారు. కొందరు వ్యక్తులు ప్రత్యేకంగా జూమ్ మీటింగ్లు పెట్టుకుని మరీ తనను టార్గెట్ చేస్తున్నారని, తన మాటలను వక్రీకరించి వివాదాన్ని పెద్దది చేశారని ఆయన ఆవేదన వ్యక్తం చేశారు. ఇండస్ట్రీలో తనకు వ్యతిరేకంగా జరుగుతున్న పరిణామాలపై ఆయన అసహనం వ్యక్తం చేశారు.
‘దండోరా’ సినిమా ఈవెంట్లో తాను మాట్లాడిన మాటల్లో కేవలం రెండు పదాలు మాత్రమే తప్పని, వాటికి సంబంధించి ఇప్పటికే బేషరతుగా క్షమాపణ చెప్పానని శివాజీ గుర్తు చేశారు. ఒక తండ్రి స్థానంలో ఉండి, పిల్లలకు హితబోధ చేయాలనే మంచి ఉద్దేశంతోనే తాను ఆ మాటలు అన్నానని, అందులో ఎటువంటి చెడు ఉద్దేశం లేదని ఆయన కమిషన్కు వివరించారు. ప్రభుత్వ సంస్థలపై ఉన్న గౌరవంతోనే తాను స్వయంగా వచ్చి వివరణ ఇచ్చానని ఆయన స్పష్టం చేశారు.
ఈ వివాదాన్ని ఇక్కడితో ముగించాలని, అనవసరంగా రాద్ధాంతం చేయవద్దని ఆయన కోరారు. సమాజం పట్ల బాధ్యత ఉన్న వ్యక్తిగా తాను మాట్లాడానని, తన వ్యక్తిత్వాన్ని కించపరిచేలా జరుగుతున్న ప్రచారాన్ని నమ్మవద్దని పేర్కొన్నారు. మహిళా కమిషన్ తన వివరణను సానుకూలంగా పరిశీలిస్తుందని ఆశిస్తున్నట్లు ఆయన తెలిపారు. ప్రస్తుతం శివాజీ చేసిన ఈ కుట్ర ఆరోపణలు సినీ ఇండస్ట్రీలో చర్చనీయాంశంగా మారాయి.
