ఆది సాయికుమార్ హీరోగా, అర్చన అయ్యర్ హీరోయిన్గా నటించిన తాజా చిత్రం ‘శంబాల’ ప్రమోషన్స్ ప్రస్తుతం జోరుగా సాగుతున్నాయి. యుగంధర్ మునీ దర్శకత్వంలో రూపొందిన ఈ సినిమాను మహీధర్ రెడ్డి, అన్నాభీమోజు నిర్మించారు. క్రిస్మస్ కానుకగా ఈ చిత్రం డిసెంబర్ 25న విడుదల కానున్న నేపథ్యంలో, చిత్రబృందం ఘనంగా ప్రీ రిలీజ్ ఈవెంట్ను నిర్వహించింది.
ఈ వేడుకలో సీనియర్ నటుడు సాయికుమార్ మాట్లాడుతున్న సమయంలో ఒక ఆసక్తికర పరిణామం చోటుచేసుకుంది. సాయికుమార్ మైక్ పట్టుకుని అతిథిగా వచ్చిన కిరణ్ అబ్బవరంను ప్రశంసిస్తుండగా, పక్కనే ఉన్న ఆది సాయికుమార్ తన ఫోన్ చూస్తూ నిలబడ్డారు. ఇది గమనించిన సాయికుమార్.. “నేను మాట్లాడుతుంటే నువ్వు ఫోన్ చూడడం ఏంటి? ఫోన్ పక్కన పెట్టి ఇలా రా” అంటూ స్టేజ్పైనే కొడుకు ఆదిని గట్టిగా హెచ్చరించారు.
తండ్రి హెచ్చరికతో ఆది వెంటనే అలర్ట్ అయ్యి ఫోన్ పక్కన పెట్టగా, దీనికి సంబంధించిన వీడియో ఇప్పుడు సోషల్ మీడియాలో వైరల్గా మారింది. ఈ వీడియోను చూసిన నెటిజన్లు రకరకాలుగా స్పందిస్తున్నారు; కొందరు క్రమశిక్షణ విషయంలో సాయికుమార్ తీరును సమర్థిస్తుండగా, మరికొందరు ఇది సరదాగా జరిగిన సంఘటన అని అభిప్రాయపడుతున్నారు. ఏదేమైనా, ఈ వైరల్ వీడియో ప్రస్తుతం ‘శంబాల’ సినిమాకు మంచి పబ్లిసిటీగా మారిందని సినీ వర్గాలు చెబుతున్నాయి.
