రామ్ పోతినేని, భాగ్యశ్రీ బోర్సే జంటగా నటించిన చిత్రం ‘ఆంధ్ర కింగ్ తాలూకా’. మహేష్ బాబు.పి దర్శకత్వం వహించిన ఈ సినిమా నవంబర్ 27న థియేటర్లలో విడుదలై విమర్శకుల ప్రశంసలు అందుకుంది. అయితే బాక్సాఫీస్ వద్ద ఆశించిన స్థాయిలో వసూళ్లను రాబట్టలేకపోయిన ఈ చిత్రం, ఇప్పుడు డిజిటల్ ప్రేక్షకులను అలరించడానికి సిద్ధమైంది. ప్రముఖ ఓటీటీ సంస్థ నెట్ఫ్లిక్స్ ఈ సినిమా డిజిటల్ హక్కులను సొంతం చేసుకుంది.
క్రిస్మస్ కానుకగా ఈ చిత్రాన్ని డిసెంబర్ 25వ తేదీ నుండి నెట్ఫ్లిక్స్లో స్ట్రీమింగ్ చేయనున్నట్లు అధికారిక ప్రకటన వెలువడింది. తెలుగుతో పాటు హిందీ, తమిళం, మలయాళం, కన్నడ భాషల్లో కూడా ఈ సినిమా అందుబాటులోకి రానుంది. కేవలం నాలుగు వారాల వ్యవధిలోనే ఈ చిత్రాన్ని ఓటీటీలోకి తీసుకువస్తుండటం విశేషం. థియేటర్లలో మిస్ అయిన ప్రేక్షకులు ఇప్పుడు ఇంటి నుండే ఈ యాక్షన్ డ్రామాను వీక్షించవచ్చు.
నెట్ఫ్లిక్స్ ఈ సినిమాను ఒక ‘ఫ్యాన్ బయోపిక్’గా అభివర్ణించింది. సాధారణంగా సినీ స్టార్ల బయోపిక్లను చూస్తుంటాం, కానీ ఒక అభిమాని కథతో తెరకెక్కిన బయోపిక్ కావడంతో దీనిపై ఆసక్తి నెలకొంది. కన్నడ స్టార్ ఉపేంద్ర ఒక కీలక పాత్రలో నటించిన ఈ చిత్రాన్ని మైత్రీ మూవీ మేకర్స్ నిర్మించారు. ఒక వైవిధ్యమైన కథాంశంతో రూపొందిన ఈ చిత్రం ఓటీటీలో ఎలాంటి స్పందన పొందుతుందో చూడాలి.
