బాలీవుడ్ స్టార్ హీరో షారుఖ్ ఖాన్ కుమారుడు ఆర్యన్ ఖాన్ మరోసారి వివాదంలో చిక్కుకున్నారు. నవంబర్ 28న బెంగళూరులోని ఓ పబ్లో జరిగిన ప్రైవేట్ ఈవెంట్లో ఇతను బహిరంగంగా అసభ్యకరమైన సైగ (మధ్య వేలు చూపడం) చేశారని ఆరోపణలు వచ్చాయి. ఈ ఘటనకు సంబంధించిన వీడియోలు సోషల్ మీడియాలో వైరల్ కావడంతో ఈ విషయం వెలుగులోకి వచ్చింది. పబ్లో మహిళలు ఉన్న సమయంలో వారి మర్యాదకు భంగం కలిగేలా ఆర్యన్ ప్రవర్తించారని పేర్కొంటూ, ఒవైజ్ హుస్సేన్ అనే న్యాయవాది పోలీసులకు ఫిర్యాదు చేశారు.
న్యాయవాది ఫిర్యాదు మేరకు పోలీసులు ఆర్యన్ ఖాన్పై చర్యలు చేపట్టారు. భారతీయ న్యాయ సంహిత (BNS) కింద ఎఫ్ఐఆర్ నమోదు చేయాలని ఫిర్యాదులో కోరారు. ఈ విషయంపై పోలీసులు తక్షణమే స్పందించి, వైరల్ అవుతున్న సోషల్ మీడియా పోస్టుల ఆధారంగా సుమోటో విచారణ ప్రారంభించారు. ఇందులో భాగంగా, ఘటన జరిగిన పబ్ ప్రాంగణంలోని సీసీటీవీ ఫుటేజీని స్వాధీనం చేసుకుని, ఆ వీడియోలను క్షుణ్ణంగా పరిశీలిస్తున్నారు.
ప్రస్తుతం ఈ కేసు విచారణ దశలో ఉంది. సీసీటీవీ ఫుటేజీల పరిశీలన మరియు ఇతర ఆధారాల సేకరణ పూర్తయిన తర్వాత, ఆ నివేదిక ఆధారంగా ఆర్యన్ ఖాన్పై తదుపరి చర్యలు తీసుకుంటామని పోలీసు అధికారులు స్పష్టం చేశారు. గతంలో డ్రగ్స్ కేసులో అరెస్టై వార్తల్లో నిలిచిన ఆర్యన్ ఖాన్, ఇప్పుడు ఈ అసభ్య ప్రవర్తన ఆరోపణలతో మళ్లీ బాలీవుడ్ వర్గాల్లో మరియు సోషల్ మీడియాలో చర్చనీయాంశంగా మారారు.
