ఓటీటీ ప్రేక్షకులను నవ్వులతో ముంచెత్తిన సూపర్ హిట్ వెబ్ సిరీస్ ‘సేవ్ ద టైగర్స్’ మరోసారి రాబోతోంది. ఇప్పటికే రెండు సీజన్లతో భార్యాబాధిత భర్తల కథను వినోదాత్మకంగా చూపించి భారీ క్రేజ్ సంపాదించిన ఈ సిరీస్.. ఇప్పుడు మూడో సీజన్తో జియో హాట్స్టార్లో సందడి చేసేందుకు సిద్ధమైంది. తాజాగా మేకర్స్ రిలీజ్ చేసిన పోస్టర్, ట్యాగ్లైన్ సోషల్ మీడియాలో వైరల్గా మారాయి.
“వాళ్లు దేవుడి ప్లాన్ను నమ్మారు.. కానీ దేవుడే స్క్రిప్ట్ మార్చేస్తే?” అనే క్యాప్షన్తో విడుదల చేసిన పోస్టర్ ఈసారి కథ మరింత ఫన్నీగా, ఊహించని ట్విస్టులతో ఉండబోతుందనే హింట్ ఇస్తోంది.
ఈసారి ఫన్ డోస్ 3X!
గత రెండు సీజన్లలో నవ్వులతో అలరించిన టైగర్స్.. ఈసారి మూడింతల వినోదంతో తిరిగి వస్తున్నారని మేకర్స్ ప్రకటించారు. ఫన్, కన్ఫ్యూజన్, ఫ్రస్ట్రేషన్ అన్నీ ఈ సీజన్లో ట్రిపుల్ డోస్లో ఉండబోతున్నాయట.
ప్రియదర్శి, అభినవ్ గోమటం, చైతన్య కృష్ణ తమ కామెడీ టైమింగ్తో మరోసారి ప్రేక్షకులను ఎంటర్టైన్ చేయనుండగా.. పావని గంగిరెడ్డి, సుజాత, దేవయాని కూడా తమ పాత్రల్లో కొనసాగనున్నారు. కుటుంబ జీవితంలో జరిగే చిన్న చిన్న సంఘటనలను హిలేరియస్గా చూపించడం ఈ సిరీస్ స్పెషాలిటీగా మారింది.
దేవుడి గెటప్లో వెన్నెల కిషోర్!
ఈసారి కథలోకి దేవుడి పాత్ర ఎంట్రీ ఇవ్వడం ఆసక్తిని పెంచుతోంది. పోస్టర్లో వెన్నెల కిషోర్ దేవుడి గెటప్లో కనిపించడంతో.. టైగర్స్ జీవితాలను ఈయన ఎలా మార్చబోతున్నారన్నది ఇప్పుడు ఆడియన్స్లో క్యూరియాసిటీగా మారింది.
అలాగే ఈ సీజన్లో గంగవ్వ, సీరత్ కపూర్ వంటి కొత్త క్యారెక్టర్లు కూడా కనిపించనుండటంతో కథలో మరింత ఫ్రెష్నెస్ వచ్చేలా కనిపిస్తోంది.
భారీ అంచనాల్లో సీజన్ 3
మహి వి రాఘవ్, ప్రదీప్ అద్వైతం రూపొందించిన ‘సేవ్ ద టైగర్స్’ మొదటి రెండు సీజన్లు డిస్నీ ప్లస్ హాట్స్టార్లో భారీ విజయాన్ని అందుకున్నాయి. ముఖ్యంగా ఎలాంటి అసభ్యత లేకుండా క్లీన్ కామెడీతో ఫ్యామిలీ ఆడియన్స్ను ఆకట్టుకోవడం ఈ సిరీస్కు పెద్ద ప్లస్ అయింది.
గంటా రవి, రాహుల్, విక్రమ్ పాత్రలు ఎదుర్కొనే మ్యారేజ్ ప్రాబ్లమ్స్ చాలా మంది ప్రేక్షకులకు కనెక్ట్ కావడంతో ఈ సిరీస్కు మంచి ఆదరణ లభించింది. ఇప్పుడు జియో-హాట్స్టార్ కలయిక తర్వాత వస్తున్న మూడో సీజన్పై కూడా భారీ అంచనాలు నెలకొన్నాయి.
త్వరలోనే స్ట్రీమింగ్ డేట్ను అధికారికంగా ప్రకటించనున్నట్లు తెలుస్తోంది. ఇక ఈ మూడు టైగర్స్ జీవితాల్లో దేవుడు రాసిన కొత్త స్క్రిప్ట్ ఏంటి? వాళ్లకు ఇంకెన్ని కష్టాలు ఎదురవుతాయి? అన్నది తెలుసుకోవాలంటే ఇంకొన్ని రోజులు వెయిట్ చేయాల్సిందే.
