సూపర్ స్టార్ Mahesh Babu మరియు దర్శకధీరుడు S. S. Rajamouli కాంబినేషన్లో తెరకెక్కుతున్న ప్రతిష్టాత్మక చిత్రం ‘వారణాసి’ షూటింగ్ ప్రస్తుతం కీలక దశలో కొనసాగుతోంది. మొదట ప్లాన్ చేసిన విధంగా షూటింగ్ షెడ్యూల్స్ సాగాలని భావించినప్పటికీ, అంతర్జాతీయ పరిస్థితులు మాత్రం అనుకున్నట్టుగా సహకరించడం లేదు. మిడిల్ ఈస్ట్లో నెలకొన్న ఉద్రిక్తతలు, గ్లోబల్ మార్కెట్లో ఉన్న అనిశ్చితి కారణంగా విదేశీ షెడ్యూల్స్పై జక్కన్న టీమ్ జాగ్రత్తగా వ్యవహరిస్తోంది. దీంతో ప్రస్తుతం షూటింగ్ను హైదరాబాద్ పరిసర ప్రాంతాలకు మార్చినట్టు తెలుస్తోంది.
అల్యూమినియం ఫ్యాక్టరీ, శంషాబాద్ ప్రాంతాల్లో ముఖ్యమైన సన్నివేశాలను చిత్రీకరించేందుకు ప్లాన్ చేస్తున్నారు. గతంలో ‘దేవర’ కోసం రూపొందించిన సముద్ర సెట్ను ‘వారణాసి’ కోసం వినియోగిస్తున్నారన్న వార్తలు కూడా వైరల్ అవుతున్నాయి. అయితే ఇది నిజమా కాదా అన్నది పక్కన పెడితే, ఏ సెట్నైనా తన స్టైల్తో కొత్తగా చూపించే మాంత్రికుడు రాజమౌళి అనే విషయంలో సందేహం లేదు. పర్ఫెక్షన్ కోసం పేరుగాంచిన ఆయన ముందుగానే ప్రతి అంశాన్ని ప్లాన్ చేసుకుంటారు.
ఇక ఈ సినిమాలోని కొన్ని కీలక సన్నివేశాలను అంటార్కిటికా, జార్జియా, కెన్యా వంటి దేశాల్లో చిత్రీకరించాల్సి ఉంది. కొన్ని భాగాలు ఇప్పటికే పూర్తి అయినప్పటికీ, మిగిలిన షెడ్యూల్స్ను వేసవి తర్వాత ప్లాన్ చేస్తున్నారు. అయితే ప్రస్తుత అంతర్జాతీయ ఉద్రిక్తతల నేపథ్యంలో, ముఖ్యంగా ఇరాన్-అమెరికా పరిస్థితులు ఎలా మారతాయో అన్న అనిశ్చితి కారణంగా పెద్ద విదేశీ షెడ్యూల్స్పై టీమ్ రిస్క్ అనాలిసిస్ చేస్తోందట.
2027 ఏప్రిల్ విడుదల లక్ష్యంగా ఈ సినిమాను సిద్ధం చేస్తున్నారు. ఈ డేట్ మిస్ కాకూడదని అభిమానులు ఆశిస్తున్నప్పటికీ, క్వాలిటీ విషయంలో రాజీ పడని రాజమౌళి అవసరమైతే వాయిదా వేయడానికైనా సిద్ధమే కానీ కాంప్రమైజ్ మాత్రం చేయరని ఇండస్ట్రీలో టాక్. ప్రస్తుతం మాత్రం ఎలాంటి సందేహాలకు తావులేకుండా టీమ్ ప్లాన్ ప్రకారమే షూటింగ్ను కొనసాగిస్తోంది. ఏదైనా అనూహ్య పరిణామం తప్పితే విడుదల తేదీలో మార్పు ఉండే అవకాశాలు తక్కువగానే కనిపిస్తున్నాయి.
