సూపర్ స్టార్ మహేష్ బాబు – దర్శకధీరుడు ఎస్.ఎస్. రాజమౌళి కాంబినేషన్లో తెరకెక్కుతున్న మోస్ట్ అవేటెడ్ పాన్ వరల్డ్ అడ్వెంచర్ మూవీ ‘వారణాసి’పై మరో క్రేజీ అప్డేట్ బయటకు వచ్చింది. ఈ సినిమా కోసం ప్రపంచవ్యాప్తంగా ఎదురుచూస్తున్న అభిమానులకు జక్కన్న స్వయంగా గుడ్ న్యూస్ చెప్పడంతో సోషల్ మీడియాలో ఈ వార్త వైరల్గా మారింది.
ఫ్రాన్స్లో జరిగిన ప్రతిష్టాత్మక ఆన్సీ ఇంటర్నేషనల్ యానిమేషన్ ఫెస్టివల్లో పాల్గొన్న రాజమౌళి, అంతర్జాతీయ మీడియాతో మాట్లాడారు. ఈ సందర్భంగా సినిమా షూటింగ్ గురించి కీలక వివరాలను వెల్లడించారు.
జక్కన్న తెలిపిన ప్రకారం… ‘వారణాసి’ షూటింగ్ ప్రస్తుతం చివరి దశకు చేరుకుంది. సినిమాకు ప్రధాన ఆకర్షణగా నిలిచే భారీ యాక్షన్ సీక్వెన్స్ల చిత్రీకరణ ఇప్పటికే పూర్తయిందని ఆయన వెల్లడించారు. దీంతో సినిమా అనుకున్న ప్లాన్ ప్రకారమే వేగంగా పూర్తి అవుతోందని స్పష్టమైంది.
ప్రస్తుతం చిత్రబృందం కథను ముందుకు తీసుకెళ్లే కీలక ప్యాచ్వర్క్ సన్నివేశాలు, కనెక్టింగ్ సీన్స్ చిత్రీకరణలో బిజీగా ఉంది. మరో నాలుగు నెలల్లో, అంటే ఈ ఏడాది సెప్టెంబర్ లేదా అక్టోబర్ తొలి వారానికల్లా టాకీ పార్ట్తో పాటు మొత్తం షూటింగ్ పూర్తవుతుందని రాజమౌళి తెలిపారు.
ఈ చిత్రాన్ని అంతర్జాతీయ ప్రమాణాలతో ఐమాక్స్ ఫార్మాట్లో తెరకెక్కిస్తున్నట్లు కూడా ఆయన వెల్లడించారు. స్క్రీన్ ఎంత పెద్దదైనా విజువల్ క్వాలిటీ తగ్గకుండా ఉండే అత్యాధునిక టెక్నాలజీని ఉపయోగిస్తున్నామని, మొదట్లో కొన్ని సవాళ్లు ఎదురైనా ఇప్పుడు టీమ్ పూర్తిగా ఆ టెక్నాలజీపై పట్టు సాధించిందని చెప్పారు.
ఇక సినిమాలో మహేష్ బాబు సరసన గ్లోబల్ స్టార్ ప్రియాంక చోప్రా హీరోయిన్గా నటిస్తుండగా, ‘కుంభ’ అనే పవర్ఫుల్ పాత్రలో మలయాళ స్టార్ హీరో పృథ్వీరాజ్ సుకుమారన్ కనిపించనున్నారు. ఈ స్టార్ కాస్టింగ్తో సినిమాపై అంచనాలు మరింత పెరిగాయి.
మరోవైపు ఇటీవల ప్రభాస్ కూడా ‘బాహుబలి 3’ ప్రాజెక్ట్ భవిష్యత్తులో ఉండే అవకాశాన్ని ప్రస్తావించడంతో, రాజమౌళి సినిమాలపై మరోసారి భారీ చర్చ మొదలైంది.
అన్ని పనులు అనుకున్న సమయానికి పూర్తయితే… ‘వారణాసి’ 2027 ఏప్రిల్ 7న ప్రపంచవ్యాప్తంగా గ్రాండ్గా విడుదల కానుంది. షూటింగ్ ముగిసిన తర్వాత లాంగ్ పోస్ట్ ప్రొడక్షన్, భారీ స్థాయి వీఎఫ్ఎక్స్ పనుల కోసం రాజమౌళి ప్రత్యేకంగా సమయం కేటాయించనున్నట్లు సమాచారం.
మొత్తానికి… మహేష్ బాబు కెరీర్లోనే అత్యంత భారీ ప్రాజెక్ట్గా తెరకెక్కుతున్న ‘వారణాసి’ ప్రతి అప్డేట్తో అభిమానుల్లో అంచనాలను మరింత పెంచుతోంది.
