మారుతి దర్శకత్వంలో తెరకెక్కిన హార్రర్ కామెడీ ఎంటర్టైనర్ ‘ది రాజా సాబ్’ సెన్సార్ పనులను పూర్తి చేసుకుంది. సెన్సార్ బోర్డు ఈ చిత్రానికి U/A సర్టిఫికెట్ జారీ చేసింది. అయితే, ఈ సినిమా రన్ టైం ఇప్పుడు టాలీవుడ్లో హాట్ టాపిక్గా మారింది. ఈ చిత్రం మొత్తం 183 నిమిషాల (3 గంటల 3 నిమిషాలు) నిడివితో రానుంది. సాధారణంగా కామెడీ సినిమాల రన్ టైం తక్కువగా ఉంటుంది, కానీ మారుతి ఈ భారీ బడ్జెట్ చిత్రంతో ప్రేక్షకులను ఏ స్థాయిలో అలరిస్తారో చూడాలి.
ఈ సినిమా సంక్రాంతి కానుకగా జనవరి 9, 2026న ప్రపంచవ్యాప్తంగా ఐదు భాషల్లో విడుదల కానుంది. చాలా కాలం తర్వాత ప్రభాస్ ఒక వింటేజ్ లుక్లో, వినోదాత్మకమైన పాత్రలో కనిపిస్తుండటంతో అభిమానుల్లో భారీ అంచనాలు నెలకొన్నాయి. ఇందులో నిధి అగర్వాల్, మాళవికా మోహనన్ మరియు రిద్దికుమార్ హీరోయిన్లుగా నటిస్తున్నారు. ఇప్పటికే విడుదలైన టీజర్, సాంగ్స్కు అద్భుతమైన స్పందన లభించింది.
సినిమా ప్రమోషన్లను భారీ స్థాయిలో ప్లాన్ చేసిన చిత్ర యూనిట్, డిసెంబర్ 27న హైదరాబాద్లో కనీవినీ ఎరుగని రీతిలో ప్రీ-రిలీజ్ ఈవెంట్ను నిర్వహించబోతోంది. థమన్ అందించిన సంగీతం ఈ సినిమాకు ప్రధాన ఆకర్షణగా నిలవనుంది. ‘కల్కి 2898 AD’ వంటి భారీ విజయం తర్వాత ప్రభాస్ నుంచి వస్తున్న సినిమా కావడంతో, బాక్సాఫీస్ వద్ద ‘రాజా సాబ్’ కొత్త రికార్డులను సృష్టించడం ఖాయంగా కనిపిస్తోంది.
