టాలీవుడ్ సెన్సేషన్, ‘సీతారామం’ బ్యూటీ మృణాల్ ఠాకూర్ ఒక్కసారిగా సోషల్ మీడియాలో హాట్ టాపిక్గా మారారు. ఆమె బేబీ బంప్తో కనిపిస్తున్న ఒక వీడియో నెట్టింట వైరల్ కావడంతో అభిమానులు షాక్కు గురయ్యారు. ఇటీవలే ధనుష్తో పెళ్లి అంటూ వస్తున్న రూమర్ల నడుమ, ఈ ప్రెగ్నెన్సీ వీడియో బయటకు రావడంతో అసలు ఏం జరుగుతుందో అర్థం కాక నెటిజన్లు రకరకాల చర్చలు మొదలుపెట్టారు. అయితే, ఆ వీడియో వెనుక ఉన్న అసలు రహస్యం వేరే ఉంది.
వైరల్ అవుతున్న ఆ వీడియో మృణాల్ వ్యక్తిగత జీవితానికి సంబంధించింది కాదు, ఆమె నటిస్తున్న కొత్త సినిమా షూటింగ్ సెట్లోనిది. బాలీవుడ్ హీరో వరుణ్ ధావన్ ప్రధాన పాత్రలో నటిస్తున్న ‘హై జవానీ తో ఇష్క్ హోనా హై’ చిత్రంలో మృణాల్ ఒక గర్భిణి పాత్రను పోషిస్తోంది. షూటింగ్ విరామ సమయంలో తీసిన ఈ క్లిప్పింగ్లో వరుణ్ ధావన్ ఆమెకు సహకరిస్తూ కనిపించడంతో, అది చూసిన వారు పొరపడ్డారు. దీంతో ఆ బేబీ బంప్ కేవలం సినిమా కోసమే ధరించిన ‘ప్రోస్తెటిక్’ అని స్పష్టమైంది.
ప్రముఖ దర్శకుడు డేవిడ్ ధావన్ తెరకెక్కిస్తున్న ఈ సినిమా పూర్తిస్థాయి రొమాంటిక్ కామెడీ ఎంటర్టైనర్గా రూపొందుతోంది. ఇందులో మృణాల్ పాత్ర చాలా విభిన్నంగా ఉండబోతోందని, కథలో ఆమె గర్భవతిగా కనిపించే సన్నివేశాలు అత్యంత కీలకంగా ఉంటాయని సమాచారం. పూజా హెగ్డే, మౌనీ రాయ్ కూడా నటిస్తున్న ఈ చిత్రం ఏప్రిల్ 10న విడుదల కానుంది. మొత్తానికి ఈ చిన్న క్లారిటీతో మృణాల్ ఫ్యాన్స్ ఊపిరి పీల్చుకున్నారు.
