భారతదేశ సంగీత చరిత్రలో చిరస్థాయిగా నిలిచిపోయిన మహాగాయని, భారతరత్న ఎమ్మెస్ సుబ్బులక్ష్మి జీవిత కథ ఇప్పుడు వెండితెరపై ఆవిష్కృతం కాబోతోంది. జాతీయ అవార్డు గ్రహీత, ‘జెర్సీ’ ఫేమ్ దర్శకుడు గౌతమ్ తిన్ననూరి ఈ ప్రతిష్టాత్మక బయోపిక్ను తెరకెక్కించనున్న సంగతి తెలిసిందే. అయితే ఈ సినిమాలో ఎమ్మెస్ సుబ్బులక్ష్మి పాత్రలో ఎవరు నటిస్తారనే ప్రశ్నకు తాజాగా ఆసక్తికర సమాధానం దొరికినట్లు సినీ వర్గాల్లో ప్రచారం జరుగుతోంది.
తాజా సమాచారం ప్రకారం, ఈ అరుదైన పాత్ర కోసం నేషనల్ క్రష్ రష్మిక మందన్న పేరు దాదాపు ఖరారైనట్లు తెలుస్తోంది. ఇటీవల చిత్రబృందం రష్మికతో ప్రత్యేకంగా లుక్ టెస్ట్ నిర్వహించినట్లు టాక్ వినిపిస్తోంది. సంప్రదాయ దుస్తుల్లో ఆమె లుక్, హావభావాలు దర్శకుడు గౌతమ్ తిన్ననూరిని బాగా ఆకట్టుకున్నాయని సమాచారం. ముఖ్యంగా ఎమ్మెస్ సుబ్బులక్ష్మి వ్యక్తిత్వానికి అవసరమైన సౌమ్యత, హుందాతనం రష్మికలో కనిపించడంతో ఆమెకే గ్రీన్ సిగ్నల్ ఇచ్చినట్లు ఇండస్ట్రీ వర్గాలు చెబుతున్నాయి.
ఈ బయోపిక్ ప్రకటించినప్పటి నుంచి ప్రధాన పాత్ర కోసం పలువురు ప్రముఖ నటీమణుల పేర్లు తెరపైకి వచ్చాయి. మొదట సాయి పల్లవి పేరు బలంగా వినిపించగా, ఆ తర్వాత కన్నడ నటి రుక్మిణి వసంత్ కూడా రేసులో ఉన్నట్లు వార్తలు వచ్చాయి. అయితే తాజా పరిణామాలతో వారందరినీ వెనక్కి నెట్టి రష్మిక మందన్న ఈ ప్రతిష్టాత్మక అవకాశాన్ని సొంతం చేసుకున్నట్లు తెలుస్తోంది.
ప్రస్తుతం రష్మిక పలు పాన్ ఇండియా చిత్రాలతో బిజీగా ఉన్నప్పటికీ, ఎమ్మెస్ సుబ్బులక్ష్మి వంటి గొప్ప వ్యక్తిత్వాన్ని తెరపై ఆవిష్కరించే అవకాశం ఆమె కెరీర్లో అత్యంత ప్రత్యేకమైన ప్రాజెక్ట్గా నిలిచే అవకాశం ఉందని సినీ విశ్లేషకులు అభిప్రాయపడుతున్నారు.
మరోవైపు, సంగీత ప్రపంచంలో ఎన్నో అపూర్వ విజయాలు సాధించి భారతరత్న అందుకున్న ఎమ్మెస్ సుబ్బులక్ష్మి జీవితం, ఆమె సంగీత ప్రస్థానం, వ్యక్తిగత ప్రయాణం వంటి అంశాలను ఈ బయోపిక్లో ఎంతో భావోద్వేగంగా చూపించనున్నట్లు తెలుస్తోంది.
అయితే రష్మిక ఎంపికపై చిత్రబృందం నుంచి ఇంకా అధికారిక ప్రకటన వెలువడాల్సి ఉంది. ఒకవేళ ఇదే నిజమైతే, రష్మిక కెరీర్లో ఇది అత్యంత ప్రతిష్టాత్మకమైన పాత్రగా నిలవడం ఖాయమని చెప్పవచ్చు.
