పాన్-ఇండియా స్టార్ దుల్కర్ సల్మాన్ బాలీవుడ్ పని సంస్కృతిపై సంచలన వ్యాఖ్యలు చేశారు. హిందీ మరియు మలయాళ చిత్ర పరిశ్రమల మధ్య పనితీరులో ఎంతో వ్యత్యాసం ఉందని ఆయన అన్నారు. ముఖ్యంగా, బాలీవుడ్లో స్టార్డమ్ ఉంటేనే గౌరవం దక్కుతుందని, లేకపోతే తీవ్ర నిర్లక్ష్యానికి గురికావాల్సి వస్తుందని తన అనుభవాలను పంచుకున్నారు.
దుల్కర్ సల్మాన్ ఒక ఇంటర్వ్యూలో మాట్లాడుతూ, “బాలీవుడ్లో నటించేటప్పుడు, నేను స్టార్ అని అందరినీ నమ్మించాల్సి వచ్చేది. లగ్జరీ కారులో వస్తేనే స్టార్గా గుర్తిస్తారు. అలా లేకపోతే సెట్లో కనీసం కూర్చోవడానికి కుర్చీ కూడా ఇవ్వరు, మానిటర్ చూడటానికి స్థలం కూడా కేటాయించరు” అని విమర్శించారు. ఆయన 2018లో ‘కార్వాన్’ చిత్రంతో హిందీ పరిశ్రమలోకి అడుగుపెట్టారు.
మలయాళ చిత్ర పరిశ్రమ దీనికి పూర్తి భిన్నంగా ఉంటుందని దుల్కర్ స్పష్టం చేశారు. మలయాళంలో సినిమాలకు ఎక్కువ ఖర్చు ఉండదని, లగ్జరీకి ప్రాధాన్యం ఇవ్వరని, చాలా వస్తువులు ఇంటి నుంచే తెచ్చుకుంటామని ఆయన వివరించారు. ఇక దుల్కర్ సినిమాల విషయానికొస్తే, ఆయన నటించిన ‘కాంత’ చిత్రం డిసెంబర్ 12 నుంచి నెట్ఫ్లిక్స్ వేదికగా ప్రసారం కానుంది.
