“ప్రతి ఒక్కడు దొంగే”.. పూరీ ట్వీట్.. వెనుక అసలు కథ ఇదేనా..?

డ్యాషింగ్ డైరెక్టర్ పూరీ జగన్నాథ్, ఛార్మీ కౌర్ కలిసి స్థాపించిన ‘పూరీ కనెక్ట్స్’ బ్యానర్ ప్రస్తుతం ‘స్లమ్‌డాగ్ – 33 టెంపుల్ రోడ్’ సినిమాతో బిజీగా ఉంది. విజయ్ సేతుపతి హీరోగా తెరకెక్కుతున్న ఈ పాన్ ఇండియా ప్రాజెక్ట్‌పై ఇప్పటికే మంచి అంచనాలు నెలకొన్నాయి. అయితే తాజాగా ఈ బ్యానర్ అధికారిక సోషల్ మీడియా ఖాతా నుంచి వచ్చిన ఒక పోస్ట్ ఇప్పుడు టాలీవుడ్‌లో హాట్ టాపిక్‌గా మారింది.

సాధారణంగా సినిమా అప్‌డేట్లు, పోస్టర్లు, టీజర్లు లేదా ప్రమోషనల్ కంటెంట్ మాత్రమే షేర్ చేసే పూరీ కనెక్ట్స్ అకౌంట్ నుంచి ఒక్కసారిగా వచ్చిన ఓ ఘాటు కామెంట్ అందరినీ ఆశ్చర్యానికి గురిచేసింది.

"ప్రతి ఒక్కడు దొంగ బట్టేరా... మంచోడికి చోటు లేదురా" అంటూ చేసిన పోస్ట్ సోషల్ మీడియాలో వైరల్‌గా మారింది. దీనికి కోపం, నిరాశను సూచించే ఎమోజీలను జత చేయడంతో ఈ వ్యాఖ్యల వెనుక ఉన్న అసలు కారణం ఏమిటనే చర్చ మొదలైంది.

ఈ ట్వీట్ వెనుక అసలు ఉద్దేశం ఏమిటి అనే విషయంలో నెటిజన్లు రకరకాల అభిప్రాయాలు వ్యక్తం చేస్తున్నారు. కొందరి అభిప్రాయం ప్రకారం, ఇండస్ట్రీలో ఇటీవల జరిగిన ఏదైనా పరిణామం లేదా వ్యక్తిగత అసంతృప్తికి ప్రతిస్పందనగానే ఈ పోస్ట్ వచ్చి ఉండొచ్చని భావిస్తున్నారు. గతంలో కొన్ని సినిమాలకు సంబంధించిన ఆర్థిక, వ్యాపార వివాదాలు ఎదుర్కొన్న నేపథ్యంలో ఆ బాధను పరోక్షంగా వ్యక్తపరిచారని కొందరు విశ్లేషిస్తున్నారు.

మరోవైపు, సినీ వర్గాల్లో మాత్రం పూర్తిగా భిన్నమైన అభిప్రాయం వినిపిస్తోంది. పూరీ జగన్నాథ్ సినిమాల ప్రమోషన్ స్టైల్ ఎప్పుడూ విభిన్నంగా ఉంటుందనే విషయం తెలిసిందే. ప్రేక్షకుల్లో క్యూరియాసిటీ పెంచేందుకు, సినిమాపై చర్చ మొదలయ్యేలా చేయడానికి ఆయన తరచూ కొత్త పద్ధతులను ఉపయోగిస్తుంటారు.

ప్రస్తుతం పూరీ కనెక్ట్స్ బ్యానర్‌లో విజయ్ సేతుపతి హీరోగా, సంయుక్తా మీనన్ హీరోయిన్‌గా తెరకెక్కుతున్న ‘స్లమ్‌డాగ్ – 33 టెంపుల్ రోడ్’ చిత్రం షూటింగ్ పూర్తి చేసుకుని పోస్ట్ ప్రొడక్షన్ దశలో ఉంది. ఈ నేపథ్యంలో వైరల్ అవుతున్న ఈ లైన్ సినిమాలోని కీలక డైలాగ్ అయి ఉండొచ్చనే అభిప్రాయం కూడా బలంగా వినిపిస్తోంది.

ఈ చిత్రంలో టబు, దునియా విజయ్, బ్రహ్మానందం, బ్రహ్మాజీ వంటి ప్రముఖ నటులు కీలక పాత్రలు పోషిస్తున్నారు. హర్షవర్ధన్ రామేశ్వర్ సంగీతం అందిస్తున్న ఈ సినిమా త్వరలో ప్రేక్షకుల ముందుకు రానుంది.

అయితే పూరీ జగన్నాథ్ లేదా ఛార్మీ నుంచి ఇప్పటివరకు ఎలాంటి అధికారిక వివరణ రాకపోవడంతో ఈ ట్వీట్ చుట్టూ మరింత ఆసక్తి పెరిగింది. ఇది నిజంగానే ఎవరికైనా ఇచ్చిన కౌంటరా? లేక ‘స్లమ్‌డాగ్ – 33 టెంపుల్ రోడ్’ ప్రమోషన్‌లో భాగంగా వేసిన మాస్టర్ స్ట్రోక్‌నా? అనే ప్రశ్నకు సమాధానం తెలియాలంటే మరికొంత కాలం వేచి చూడాల్సిందే.